Mae disgwyl i gannoedd o bobol fynychu parêd arbennig i ddathlu Dydd Gŵyl Dewi yng Nghaerdydd heddiw.
Bydd y parêd yn gadael Neuadd y Ddinas am 12.30 ac yn gorffen ger y castell.
Fe fydd dawnswyr carnifal, cerddorion gwerin a nifer o grwpiau cymunedol yn cymryd rhan yn y digwyddiad.
Fe fydd y parti’n parhau y tu mewn i’r castell ar ddiwedd y parêd.
Ymhlith y digwyddiadau eraill sy’n cael eu cynnal yn y brifddinas heddiw mae cyngerdd yn Neuadd Dewi Sant yng nghwmni Bryn Terfel, cyngerdd yng Nghanolfan y Mileniwm a llu o weithgareddau yn Amgueddfa Werin Cymru yn Sain Ffagan.
