Dywed Heddlu’r De fod tân mewn adeilad gwag yn ardal Sblot, Caerdydd bellach wedi’i ddiffodd, ond bod rhai ffyrdd yn parhau ar gau am y tro.
Bu diffoddwyr tân yn parhau i ymladd y tân dros nos mewn hen neuadd bingo ar Stryd Pearl, yn Sblot.
Cafodd y gwasanaethau brys eu galw i’r tan tua 12:40 prynhawn dydd Llun.
Cafodd pobl eu symud o adeiladau cyfagos a chafodd trigolion lleol eu cynghori i gadw eu drysau a’u ffenestri ar gau, ac i aros yn eu cartrefi.
Mae ffyrdd cyfagos gan gynnwys Stryd Agate, Stryd Pearl a Heol Sblot yn parhau ar gau.
Mae ymchwiliad yr heddlu i achos y tân yn parhau.
