Roedd Ahmed Mohammadi yn un o ffrindiau Nasser Muthana a ymddangosodd yn y fideo yma gan Isis
Llwyddodd dyn o Gaerdydd i gipio ei fab o grafangau gwrthryfelwyr Isis yn Syria yn gynharach eleni.
Y gred yw bod y mab 19 oed, Ahmed Mohammadi, wedi troi’n jihadi ac yn ymladd gydag eithafwyr Isis yno.
Roedd yn ffrindiau gyda dau jihadi arall o Gaerdydd, Reyaad Khan a Nasser Muthana a oedd wedi ymddangos mewn fideo propaganda Isis ym mis Mehefin yn galw ar Fwslimiaid Prydain i ymuno â nhw ar faes y gad.
Yn ôl adroddiad yn y Sunday Times heddiw, teithiodd y tad, Karim Mohammadi, o’i gartref yng Nghaerdydd i Dwrci, lle cafodd help arweinwyr cymunedol i groesi’r ffin i Syria.
Roedd Karim Mohammadi, sydd o dras Cwrdaidd ac Iracaidd, wedi ceisio help gan ei gymuned yng Nghaerdydd a oedd â chysylltiadau yn Nhwrci a Syria a gafodd hyd i’w fab.
Y cyntaf i lwyddo
Mae Ahmed Mohammadi, sydd bellach yn astudio peirianneg sifil, ymysg 300 o bobl o Brydain sydd wedi dychwelyd i Brydain o Syria ac Irac.
Pan gyrhaeddodd yn ôl i Brydain ym mis Gorffennaf, cafodd ei arestio o dan y Ddeddf Derfysgaeth, ond cafodd ei ryddhau’n ddi-gyhuddiad yr un diwrnod.
Cafodd ei gyfeirio wedyn at raglen gwrth-radicaleiddio y llywodraeth, Channel.
Roedd ei dad wedi gwadu iddo ymladd yn Syria, ac mae’r gwasanaethau cudd wedi barnu nad yw’n unrhyw fygythiad i ddiogelwch.
