Darren Hughes
Mae llawfeddyg wedi dweud wrth gwest i farwolaeth dau ddyn o dde Cymru, fu farw ar ôl derbyn arennau oedd wedi eu heintio, nad oedd unrhyw ffordd o ragweld beth ddigwyddodd.
Bu farw Robert Stuart, 67 o Gaerdydd, a Darren Hughes, 42 o Ben-y-bont ar Ogwr, y llynedd ar ôl cael trawsblaniadau yn Ysbyty Athrofaol Cymru, Caerdydd.
Clywodd y cwest ddydd Mawrth bod gan y rhoddwr 39 oed o Fanceinion “hanes arwyddocaol yn ymwneud ag alcohol”, a bod saith ysbyty arall wedi gwrthod ei arennau oherwydd eu bod yn anaddas. Bu farw o lid yr ymennydd, gafodd ei achosi gan lyngyr parasitig prin.
Datgelodd archwiliadau post-mortem fod gan Robert Stuart a Darren Hughes hefyd y parasit yn eu cyrff pan fu iddyn nhw farw.
Risg
Dywedodd y llawfeddyg ymgynghorol, Argiris Asderakis, heddiw bod meddygon yn yr ysbyty yn hyderus na fyddai llid yr ymennydd yn cael ei drosglwyddo i’r dynion dderbyniodd yr arennau wedi i brofion risg gael eu cwblhau.
“Ni all unrhyw un fod wedi rhagweld bod yr haint yma’n cael ei basio o un dyn i’r llall am y tro cyntaf erioed,” meddai Argiris Asderakis.
“Dw i ddim yn gwybod am lawer o feddygon sydd hyd yn oed yn gwybod am yr haint yma. Ond yn anffodus, ni ellir anwybyddu’r risg mewn trawsblaniadau.”
Caniatâd
Clywodd y gwrandawiad gan deulu’r ddau ddyn nad oedden nhw wedi cael gwybod bod organau’r rhoddwr wedi cael eu gwrthod gan nifer o ysbytai eraill ar ôl cael eu hystyried yn “anaddas i’w trawsblannu”.
Dywedodd tad Darren Hughes, Ian, wrth y gwrandawiad na fyddai wedi llofnodi’r ffurflen ganiatâd ar ran ei fab anabl petai’n gwybod fod yr aren wedi dod gan ddyn oedd yn gaeth i alcohol.
Mae’r cwest yn parhau.
