Un o'r lluniau o Y Gwyll/Hinterland
Y gyfres dywyll, Y Gwyll, oedd y prif enillydd yng ngwobrau blynyddol teledu Bafta Cymru yng Nghaerdydd neithiwr.
Fe gafodd dair gwobr i gyd – Richard Stoddard am oleuo a ffotograffiaeth, Jeff Murphy am y sgriptio gorau a Marc Evans wobr y cyfarwyddwr ffuglen gorau.
Roedd yna fuddugoliaethau pwysig eraill i raglenni Cymraeg:
- Y gyfres gomedi Dim Byd ar S4C a enillodd wobr y gyfres adloniant orau.
- Rhian Blythe o Landwrog, ger Caernarfon, a gafodd wobr yr actores orau am actio Grug Mathews yn y gyfres Gwaith/Cartref.
- Derbyniodd un o raglenni cyfres O’r Galon y wobr am y rhaglen ddogfen unigol orau – roedd Yr Hardys; Un dydd ar y Tro, yn trafod alcoholiaeth.
Roedd yna wobr i Gymro Cymraeg am raaglen Saesneg hefyd, wrth i Arwel Wyn Jones, sy’n wreiddiol o Landwrog ger Caernarfo, gael ei anrhydeddu am ddylunio cynhyrchiad Sherlock.
Gwobr arbennig
Y newyddiadurwr blaenllaw, Jeremy Bowen sy’n olygydd y Dwyrain Canol gyda’r BBC, a enillodd Wobr arbennig Sian Phillips am ddegawdau o ohebu ar faes y gad led-led y byd.
Roedd yna wynebau adnabyddus yn cymryd rhan yn y seremoni flynyddol, gyda’r gantores Katherine Jenkins yn perfformio cân o’i halbwm newydd a chyflwynydd y One Show, Alex Jones, ymhlith yr enwogion.
