Dafydd Elis-Thomas
Mae’r Arglwydd Dafydd Elis-Thomas wedi dweud wrth gylchgrawn Golwg bod yn rhaid i Blaid Cymru dderbyn bod mewn llywodraeth glymblaid “yn gyson” er mwyn gallu efelychu’r SNP a chynyddu ei phleidlais.
“Dyna oeddwn i’n ddweud cyn yr etholiad Cynulliad diwethaf [yn 2011],” meddai’r Aelod Cynulliad dros Ddwyfor Meirionydd.
“Fe ddewisodd y Blaid ymladd ymgyrch negyddol a dw i’n dal ddim yn deall y rhesymeg dros y ddadl honno.
“Y wers fwyaf o’r SNP ydi drwy lywodraethu’n dda yn eich gwlad mae’n bosib perswadio pobol ei bod hi’n iawn i’r wlad gael mwy o rym. Does yna ddim cwestiwn am y peth i mi.
“Waeth i bobol beidio cwyno am y Blaid Lafur gan ddweud bod Cymru’n wlad un blaid. Dydi hi ddim, does gan [Llafur] ddim mwyafrif beth bynnag yn y Cynulliad, nag ym mhleidlais gyffredin y wlad.”
Neges negyddol yn dda i ddim
Ar gyfer ymgyrch etholiadol y Cynulliad yn 2016 rhaid i Blaid Cymru gynnig atebion yn hytrach na gweld bai, ac mae’n rhaid iddi fod yn fodlon ffurfio clymblaid.
Dyna neges yr Arglwydd Elis-Thomas sy’n credu bod angen i’r Blaid feithrin hygrededd drwy gael ei gweld mewn llywodraeth.
“Ein bai ni ydi o ein bod ni heb berswadio mwy o bobol ein bod ni’n ffit i lywodraethu,” meddai. “Wrth siarad yn negyddol heb gynnig pethau positif dydi hynny ddim yn help. Yn yr etholiad nesaf mae’n rhaid i ni gael rhaglen glir a phositif gan gydweithio mewn llywodraeth.”
Cyfweliad llawn yn rhifyn wythnos yma o Golwg
