Mae’r heddlu yn apelio am wybodaeth yn dilyn gwrthdrawiad difrifol rhwng dau gar yn Sir Fynwy bnawn ddoe pan gafodd dau ddyn a dau blentyn anafiadau difrifol.
Digwyddodd y ddamwain tua 1 o’r gloch bnawn dydd Sul, rhwng pentref Crugau Morgan a Drenewydd Gelli-Farch.
Roedd car Peugeot 208 glas wedi gwrthdaro yn erbyn car Ford Focus du ger Canolfan Saethyddiaeth Dyffryn Gwy.
Roedd dyn 42 oed a dwy ferch ifanc, chwech ac wyth oed, o Fryste yn teithio yn y Peugeot. Cafodd y dyn a’r ferch chwech oed eu cludo i Ysbyty Brenhinol Gwent gydag anafiadau difrifol.
Yn yr ail gar, roedd dyn 30 oed, dynes 29 oed, a bachgen 11 oed a merch saith oed o’r ardal leol. Aed a’r dyn a’r bachgen i Ysbyty Athrofaol Cymru gydag anafiadau difrifol.
Gofynnir i unrhyw un a welodd neu sydd â gwybodaeth am y ddamwain i gysylltu â’r heddlu ar 101.
