Achub dynes o gar ar ddibyn yn y Mwmbwls

Fe fu’n rhaid i’r gwasanaethau brys achub dynes o’i char oedd yn hongian dros ochr clogwyn yn y Mwmbwls neithiwr.

Cafodd Heddlu De Cymru, Gwasanaeth Tân ac Achub Canolbarth a Gorllewin Cymru a Bad Achub y Mwmbwls eu galw i Fae Bracelet yn Abertawe am tua 9.20yh.

Roedd y car yn hongian dros ochr clogwyn tua 30 troedfedd o uchder ond ni chafodd y ddynes ei hanafu ac fe gafodd y car ei dynnu yn ol i dir gwastad.

Dywedodd llefarydd ar ran Heddlu De Cymru: “Fe wnaeth dau griw fynychu’r safle lle’r oedd cerbyd yn hongian dros ochr clogwyn.

“Cafodd un fenyw gymorth a’i chymryd i le diogel.”