Mae Heddlu De Cymru wedi cyhoeddi y bydd tair nyrs yn wynebu cyhuddiadau pellach yn dilyn ymchwiliad i esgeulustod a ffugio cofnodion cleifion yn Ysbyty Tywysoges Cymru.
Mae’r tair nyrs wedi cael eu cyhuddo o esgeulustod mewn cysylltiad â chwech o gleifion eraill. Cafodd y tair nyrs eu gwahardd o’u gwaith y llynedd.
Mae disgwyl iddyn nhw ymddangos gerbron Llys Ynadon Pen-y-bont ar Ogwr ar 28 Gorffennaf.
Dywed Heddlu’r De eu bod nhw wedi cysylltu â’r cleifion neu deuluoedd y cleifion i’w hysbysu am y datblygiadau diweddaraf.
Yn y cyfamser mae bwrdd iechyd Abertawe Bro Morgannwg wedi gwahardd nyrs arall o’r gwaith.
Mae’n golygu bod 15 nyrs wedi eu gwahardd i gyd – 14 yn Ysbyty Tywysoges Cymru ac un yn Ysbyty Treforys.
Daeth y problemau gyda’r cofnodion i’r amlwg ar ddechrau 2013.
Dywed y bwrdd iechyd eu bod yn parhau i helpu Heddlu’r De gyda’u hymchwiliadau.
