Prifysgol Glyndŵr yn ‘gofidio’n arw’ yn dilyn honiadau

Prifysgol Glyndwr
Mae Prifysgol Glyndŵr yn “gofidio’n arw” yn dilyn honiadau bod rhai o’i myfyrwyr tramor wedi twyllo mewn profion iaith Saesneg.

Collodd y brifysgol yr hawl i noddi myfyrwyr tramor yn dilyn ymchwiliad i gwmni Education Testing Services (ETS) o America, wnaeth ddarganfod dros 29,000 o ganlyniadau annilys a 19,000 o ganlyniadau amheus drwy Brydain.

Roedd 350 o fyfyrwyr Prifysgol Glyndŵr – sydd â phedwar campws yn Wrecsam, Llanelwy, Llaneurgain a Llundain a chanolfan ym Mrychdyn – ymhlith y canlyniadau annilys neu amheus.

Ymhlith yr honiadau roedd y ffaith fod arolygwyr wedi darllen neu rhoi atebion i ddosbarth cyfan.

‘Siomedig’

Mewn datganiad, dywedodd llefarydd ar ran y Brifysgol: “Mae’r Brifysgol yn gofidio’n arw bod ei thrwydded noddi wedi cael ei hatal gan Wasanaeth Fisâu a Mewnfudo’r DU (UKVI) ac rydym yn gweithio gyda nhw i ymchwilio i’r materion a godwyd.

“Mae gennym bartneriaethau â nifer o gyflenwyr ac rydym yn hynod o siomedig i fod yn destun unrhyw dwyll neu weithgaredd a fyddai’n peryglu’r drwydded honno.

“Mae cael ein rhoi yn y sefyllfa hon gan bartneriaid allanol yn peri rhwystredigaeth gan fod Prifysgol Glyndŵr yn cymryd ei chyfrifoldebau fel Noddwr o Ymddiriedaeth Uchel iawn o ddifrif ac mae wedi ymrwymo i ddarparu addysg i’r myfyrwyr rhyngwladol dilys hynny sy’n cydymffurfio’n llawn â’u gofynion mewnfudo.

“Mae’r Brifysgol wedi bod yn gweithio’n agos gydag UKVI mewn ymgais i wella ei weithrediadau ar gampws yr Elephant and Castle [yn Llundain] a bydd yn parhau i wneud hynny.

“Rydym wedi sefydlu tîm archwilio newydd a fydd yn ymateb i’r pwyntiau a godwyd fel y gellir datrys y mater hwn ac adfer trwydded y Brifysgol.”