Hunlun gohebwyr Golwg ar faes Eisteddfod yr Urdd yn Y Bala
Mae yna ddwy gystadleuaeth newydd yn Eisteddfod Genedlaethol yr Urdd eleni ac maen nhw’n agored i bawb.
Mae gwefan newyddion golwg360 yn cynnig gwobrau ariannol am y llun a’r hunlun gorau o faes yr Eisteddfod yn Y Bala.
Mae pobol eisoes wedi dechrau anfon eu lluniau trwy’r wefan gymdeithasol Twitter ac fe fydd y goreuon yn cael eu dewis ddiwedd yr wythnos.
Fe fydd gwobr o £25 am y llun cyffredinol gorau o’r Eisteddfod a £25 am yr hunlun gorau hefyd.
Beth sydd ei angen
“Rydan ni’n chwilio am lun sy’n dal ysbryd yr Eisteddfod, neu ddigwyddiad neu gymeriad difyr,” meddai Prif Weithredwr 360, Owain Schiavone.
“O ran hunlun, rydan ni’n chwilio am un sydd wedi ei gymryd mewn lle diddorol neu wrth wneud rhywbeth diddorol – o fewn y gyfraith wrth gwrs!”
Y cyfan sydd angen ei wneud yw anfon y lluniau at #llunsteddfod a’r hunlun at #hunlunsteddfod.
