Mae Heddlu mwya’ Cymru’n honni bod ffigurau troseddu yn eu hardal ar eu hisa’ ers yr 1980au.
Mae’r ffigurau diweddara’ ar gyfer Heddlu De Cymru yn dangos bod 0.5% yn llai o droseddu yn y flwyddyn at ddiwedd 2013.
Ond fe fu cynnydd mawr mewn troseddau rhyw a throseddau trais ac maen nhw’n cydnabod bod yna duedd genedlaethol at ragor o ddwyn beiciau a dwyn o siopau.
‘Gwaith caled’
Er fod corff arolygu’r heddlu – yr HMIC – wedi codi amheuon mawr am gywirdeb ffigurau plismona’n gyffredinol, mae Prif Gwnstabl Cynorthwyol Heddlu De Cymru, Richard Lewis, yn mynnu bod y ffigurau’n arwydd o waith caled ac ymroddiad.
Ond dyw e ddim wedi cynnig esboniad am gynnydd o bron 37% mewn troseddau rhyw – yn gyffredinol, mae gwell ymwybyddiaeth yn gallu bod yn rhannol gyfrifol am hynny.
Fe fu cynnydd hefyd o 12.9% mewn troseddau o drais corfforol – er bod yr Heddlu’n dweud eu bod yn gweithio’n galetach ac wedi cael clod am eu hymdrechion i leihau trais yn y cartref.
Ar i lawr
Dyma rai o’r meysydd lle bu gostyngiadau:
Lladrad – -6.8%
Dwyn ceir – -10.1%
Byrgleriaeth o dai – -7.7%
Troseddau cyffuriau – -8.8%
