Nigel Evans
Mae’r Aelod Seneddol Michael Fabricant wedi dweud wrth lys ei fod yn credu bod honiadau a glywodd bod Nigel Evans wedi ymosod yn rhywiol ar ddyn ifanc “yn groes i’w gymeriad”.
Dywedodd yr AS Ceidwadol wrth Lys y Goron Preston ei fod wedi clywed yr honiadau gan Adam Price, cyn Aelod Seneddol Plaid Cymru, dros y ffôn ym mis Gorffennaf 2009.
Roedd Adam Price wedi siarad gyda’r dyn ifanc sy’n honni i Evans ymosod arno pan oedd yn cysgu ar y soffa yn ei gartref.
“Rwy’n cofio yn eithaf eglur beth a ddywedwyd, am fy mod wedi meddwl ei bod hi’n groes i gymeriad y Nigel Evans yr oeddwn i’n ei nabod,” meddai’r AS sy’n Gadeirydd y Blaid Geidwadol.
Ychwanegodd Michael Fabricant ei fod yn “ffrindiau da” gyda Nigel Evans.
Mae Nigel Evans, 56 oed, sy’n enedigol o Abertawe ac yn Aelod Seneddol Ribble Valley yn Sir Gaerhirfryn, yn wynebu naw cyhuddiad o droseddau rhyw yn erbyn saith o ddynion sy’n dyddio o 2002 hyd at 1 Ebrill y llynedd.
Mae cyn-ddirprwy lefarydd Tŷ’r Cyffredin yn gwadu dau gyhuddiad o ymosod yn anweddus, chwe chyhuddiad o ymosod yn rhywiol ac un cyhuddiad o dreisio.
Mae’r achos yn parhau.
