Fe fydd tri dyn yn mynd gerbron ynadon Cwmbran heddiw ar gyhuddiad o droseddau’n ymwneud a chaethwasiaeth ar safle teithwyr yng Nghasnewydd.
Mae Thomas Doran, Daniel Doran a David Daniel Doran wedi eu cyhuddo o garcharu ar gam, cynllwynio i gadw person mewn caethwasiaeth a chynllwynio i sicrhau bod person yn cyflawni llafur gorfodol, yn ôl Gwasanaeth Erlyn y Goron (CPS).
Mae Thomas Doran hefyd wedi ei gyhuddo o herwgipio drwy dwyll.
Daw’r cyhuddiadau ar ôl i drydydd person gael eu darganfod gan Heddlu Gwent ar safle i deithwyr.
Fe gadarnhaodd yr heddlu eu bod wedi dod o hyd i ddyn 60 oed ar safle yn ardal Llansanffraid Gwynllŵg, Casnewydd. Yn gynharach yr wythnos hon, cafodd dyn o Wlad Pwyl ei symud o fferm gerllaw yn Llanbedr Gwynllŵg.
Fe ddechreuodd ymchwiliad yr heddlu yn gynharach eleni, ar ôl i ddyn, oedd wedi bod ar goll ers mwy na degawd, ei ddarganfod ar fferm yn Llanbedr Gwynllŵg.
Cafodd Darrell Simester o Kidderminster yn Sir Gaerwrangon ei ddarganfod ar safle i deithwyr yn Llanbedr Gwynllŵg. Roedd wedi diflannu 13 mlynedd yn ôl tra ar wyliau ym Mhorthcawl.
Mae pedwar o bobl eraill wedi cael eu harestio fel rhan o’r ymchwiliad, Operation Imperial.
