Tywysog Charles
Mae bachgen ysgol o Abertawe wedi temtio Duges Cernyw gyda’i frecwast wedi ffrio.
Ar ymweliad ag Ysgol Gynradd Craigfelen yn y ddinas, gwnaeth Nathan Hills, sy’n 11 oed, addo coginio brecwast wedi ffrio i Camilla ar ei hymweliad nesaf.
Mae’r ysgol yn cymryd rhan mewn prosiect sy’n cael ei reoli gan yr Undeb Credydau Benthyciadau a Chynilon yn y ddinas.
Nod y prosiect yw dysgu plant a phobol ifanc sut i fuddsoddi arian er mwyn osgoi mynd i ddyled.
Maen nhw’n cynilo arian trwy gyfrifon sy’n cael eu rheoli gan yr ysgol.
Mae Nathan Hills wedi bod yn rhedeg caffi yn yr ysgol er mwyn cynilo arian i brynu esgidiau pêl-droed.
Wrth esbonio wrth Dduges Cernyw beth oedd e’n ei werthu, dywedodd Nathan: “Roliau bacwn ac ry’n ni wedi dechrau gwneud brecwast llawn nawr.
“Y mwyaf ry’n ni wedi’i ennill ar y tro yw £60.
“Ry’n ni’n codi £2 am frecwast llawn a £1 am rôl bacwn.”
Mae brecwast Nathan yn cynnwys bacwn, selsig, wyau, ffa pob a hash brown.
Addawodd Camilla y byddai’n prynu’r brecwast y tro nesaf.
Mae hi ar ymweliad ag Abertawe fel rhan o’i thaith flynyddol hi a Thywysog Cymru.
