Mae Cymru’n llusgo ymhell ar ôl gwledydd eraill Prydain o ran cynnydd mewn rhoi organau gan bobol sydd wedi marw.
Tra bod y ffigwr ar draws gwledydd Prydain wedi codi o 50% yn y pum mlynedd diwetha’, dim ond 15.6% oedd y cynnydd yng Nghymru.
Roedd yna ostyngiad sylweddol yn ystod y flwyddyn ddiwetha’, o 67 i 52.
Mae’r Gweinidog Iechyd, Mark Drakeford, wedi croesawu’r cynnydd cyffredinol ond yn cydnabod bod angen gwneud rhagor.
Cynnydd llawer mwy mewn gwledydd eraill
Cyhoeddodd adran Gwaed a Thrawsblannu’r Gwasanaeth Iechyd, NHSBT, fod y ffigwr wedi codi 50% ar draws gwledydd Prydain.
Roedd y cynnydd yn 49.1% yn Lloegr, 74/1% yn yr Alban ac 85.8% yng Ngogledd Iwerddon.
Rhoddodd 1,200 o bobol organau yng ngwledydd Prydain yn ystod y flwyddyn ddiwetha’, a hynny yn ôl NHSBT, wedi helpu mwy na 3,000 o bobol.
Sylwadau’r Gweinidog Iechyd
Yn ôl Mark Drakeford, roedd disgwyl amrywiadau, oherwydd bod y ffigurau’n fach, a’r duedd oedd yn bwysig.
“Yn ystod y pum mlynedd ddiwethaf, mae nifer y rhoddwyr organau yng Nghymru wedi dilyn tuedd bositif,” meddai.
Doedd dim tystiolaeth, meddai, mai bwriad Llywodraeth Cymru i gyflwyno rheolau newydd sy’n gyfrifol am y cwymp – fe fyddai’r rheiny’n cymryd yn ganiataol fod pobol yn fodlon rhoi eu horganau ar ôl marw, os nad oedden nhw’n dweud fel arall.
‘Y ffordd orau’
Roedd y gweinidog yn mynnu mai dyna’r ffordd orau o sicrhau rhagor o organau, er bod gwrthwynebiad cryf i’r mesur.
“Rwy’n parhau i ganolbwyntio ar gyflwyno cynnydd tymor hir a chynaliadwy yn nifer y rhoddwyr organau ac i newid agwedd y cyhoedd tuag at roi organau yng Nghymru,” meddai Mark Drakeford.
