Caryl Lewis
Mae Radio Cymru wedi cyhoeddi mai Caryl Lewis yw hoff awdur y Cymry.
Cafodd y gystadleuaeth ei lansio gan Radio Cymru ar y cyd â’r Cyngor Llyfrau a Llên Cymru i nodi Diwrnod y Llyfr.
Roedd y panel yn gyfuniad o werthwyr llyfrau a llyfrgellyddion, a luniodd restr fer o ddeg o enwau.
Gofynnodd Radio Cymru i’w wrandawyr bleidleisio am yr enillydd yn dilyn trafodaeth ar raglen Nia Roberts.
Mae Caryl Lewis, sy’n enedigol o Ddihewyd ger Aberaeron ac sydd bellach yn byw ger Aberystwyth, yn ysgrifennu llyfrau i blant ac oedolion.
Mae hi wedi cyhoeddi dros ugain o gyfrolau, a chafodd ei nofel ddiweddaraf, ‘Naw Mis’, ei chyhoeddi yn 2009.
Enillodd hi wobr Tir na n-Og yn 2005 am ei nofel ‘Iawn Boi?’, a Llyfr y Flwyddyn yn yr un flwyddyn am ei nofel ‘Martha, Jac a Sianco’, a gafodd ei haddasu ar gyfer S4C yn ddiweddarach.
‘Anrhydedd fawr’
Dywedodd Caryl Lewis: “Mae’n anrhydedd fawr ennill y gystadleuaeth hon, yn enwedig felly gan mai’r darllenwyr eu hunain oedd yn gwneud y dewis.
“Mae pob awdur yn naturiol yn falch o wybod bod eu gwaith yn apelio at y gynulleidfa.”
Llyfrau’n ‘creu argraff ddofn’
Dywedodd Golygydd Rhaglenni Cyffredinol BBC Radio Cymru, Lowri Davies: “Roedd hi’n gystadleuaeth ddifyr iawn, gyda deg awdur hynod gryf ar y rhestr fer.
“Llongyfarchiadau i Caryl Lewis, yr awdur a ddaeth i’r brig.
“Mae Caryl yn sicr wedi gwneud ei marc dros y blynyddoedd diwethaf fel awdur gweithiau i blant ac oedolion, a hynny mewn sawl cyfrwng gwahanol.
“Mae gweithiau o’i heiddo, fel ei nofel ‘Martha, Jac a Sianco’ yn sicr wedi creu argraff ddofn ar ddarllenwyr Cymraeg ac mae’r wobr hon yn brawf o’i phoblogrwydd.”
