Mae Aelod Seneddol wedi annog S4C i gyhoeddi adroddiad ar wariant cyhoeddus y sianel.
Dywedodd Guto Bebb, AS Ceidwadol Aberconwy, fod angen i’r sianel “fod mor agored ag y gallan nhw efo’u cynulleidfa”, ond bod y rheolwyr newydd yn “chwa o awyr iach”.
Dywedodd fod angen i’r adroddiad fod yn gyhoeddus er mwyn sicrhau nad oes gorwario neu wastraffu arian yn digwydd.
Byddai cyhoeddi’r adroddiad, medd Guto Bebb, yn “barhad o waith da tîm rheoli S4C”.
Cyhoeddodd prif weithredwr y sianel, Ian Jones, flwyddyn yn ôl ei fod yn bwriadu comisiynu’r adroddiad er mwyn archwilio i gyflogau a thaliadau i weithwyr a chwmnïau.
Mae Cymdeithas Teledwyr Annibynnol Cymru, TAC, yn erbyn cyhoeddi’r wybodaeth.
Ymateb S4C
Dywedodd Cyfarwyddwr polisi Corfforaethol a Masnachol S4C, Elin Morris: “Fe gafodd adroddiad Mike Fegan ei ddrafftio gyda chydweithrediad cwmnïau preifat yn y sector cynhyrchu yn sgil addewid o gyfrinachedd oherwydd sensitifrwyddau masnachol.
“Ni fyddai’n briodol i dorri’r addewid hwnnw, yn enwedig o gofio na fyddai wedi bod yn bosib cwblhau’r adroddiad heb ewyllys da’r cwmnïau preifat.”
Y stori’n llawn yn rhifyn yr wythnos yma o gylchgrawn Golwg.
