Mae Llywodraeth Cymru wedi cyhoeddi bydd £106m yn cael ei fuddsoddi yng nghefn gwlad Cymru newn ymateb i’r heriau sy’n deillio o Brexit a Covid-19.
Caiff y cynlluniau eu hariannu yn rhannol gan Raglen Datblygu Gwledig yr UE 2014-20 yn ogystal â Llywodraeth Cymru ei hun.
Yn ôl y Llywodraeth bydd y cannoedd o brosiectau yn rhoi hwb i’r economi wledig, gwella bioamrywiaeth a gwella gwytnwch y sector bwyd ledled Cymru am y tair blynedd nesaf.
Bydd y prosiectau hynny a gefnogir yn cynnwys:
- Creu ac adfer coetiroedd
- Meithrin gwytnwch ymysg adnoddau naturiol Cymru a gwella bioamrywiaeth,
- Helpu busnesau bwyd i wella eu cadwyni cyflenwi, gwytnwch busnes
- Cefnogi busnesau fferm i helpu i sicrhau eu cynaliadwyedd
- Darparu Strategaeth Adfer Covid-19 ar gyfer y sector bwyd a diod.
“Mae effaith y stormydd dwys ar ein cymunedau gwledig yn gynharach eleni ac yna’r pandemig Covid-19 wedi bod yn aruthrol”, meddai Lesley Griffiths, Gweinidog yr Amgylchedd.
“Mae Llywodraeth Cymru wedi darparu cymorth ar unwaith drwy’r Gronfa Cadernid Economaidd, sy’n unigryw i Gymru, yn ogystal â chyfres o gynlluniau wedi’u targedu. Mae’r cyhoeddiad heddiw’n nodi rhywfaint o’r cyllid y byddwn yn ei ddarparu ar gyfer datblygu gwledig nid yn unig yn y dyfodol agos, ond am y tair blynedd nesaf.
“Er bod economi wledig Cymru yn wynebu sawl her mae gennym lawer o asedau a chyfleoedd y gallwn adeiladu arnynt – o’n treftadaeth naturiol ysblennydd i’r sectorau bwyd a diod ffyniannus.
“Bydd y buddsoddiad hwn gan Lywodraeth Cymru a’r Undeb Ewropeaidd yn adeiladu ar y cryfderau hynny i gefnogi swyddi ac arloesedd yn yr economi wledig mewn ffordd sy’n diogelu ein hamgylchedd naturiol ar gyfer cenedlaethau’r dyfodol.”
‘Amser heriol’
Un o rheini fydd yn derbyn cyllid ychwanegol fydd yr asiantaeth Arloesi Bwyd Cymru.
Dywedodd yr Athro David Lloyd o Arloesi Bwyd Cymru ei fod yn croesawu’r cyhoeddiad.
“Rydym wedi parhau i drafod gydag amrywiaeth o fusnesau drwy gydol yr amser anodd hwn – a dw i’n siŵr y byddan nhw’n croesawu’r cymorth hirdymor y bydd y cynnydd yng nghyllid y Cynllun Datblygu Gwledig yn ei ddarparu.
“Bydd Prosiect HELIX yn parhau i roi cymorth hanfodol i fusnesau Cymru wrth iddyn nhw geisio datblygu cynnyrch newydd, gwastraffu llai ac ennill ardystiad sy’n cael ei gydnabod yn rhyngwladol.”
Dywedodd Huw Thomas, Rheolwr Gyfarwyddwr Puffin Foods: “Mae’r cyfnod diweddar wedi taro’r sector bwyd a chynnyrch yn arbennig o galed – bydd y cyhoeddiad hwn yn gymorth i ddarparu lefel o sicrwydd y mae mawr ei angen ar fusnesau ledled Cymru.”
