Teuluoedd ar incwm isel sydd â phlant fydd yn dioddef waethaf yn sgil yr argyfwng costau byw, yn ôl un elusen.
Mae disgwyl cadarnhad yr wythnos hon y bydd y cap ar brisiau ynni yn codi 82%, o £1,971 i £3,582, ym mis Hydref.
Yn ôl arolwg a gafodd ei gynnal ddechrau’r haf, roedd 53% o bobol yng Nghymru yn meddwl y bydd rhaid iddyn nhw ddefnyddio llai o ynni yn y chwe mis nesaf.
Ond yn ôl Cyngor ar Bopeth Cymru, mae’r arolygon diweddaraf yn dangos bod yr ofnau hynny wedi gwaethygu gyda rhai grwpiau’n fwy tebygol o ddweud eu bod nhw am orfod defnyddio llai o ynni nawr.
- 66% o bobol gyda phlant 18 oed ac iau ar yr aelwyd.
- 58% o deuluoedd ar incwm isel.
- 61% o’r rhai ag anableddau neu sydd â chyflwr iechyd hirdymor (o gymharu â 50% o’r rhai heb).
- 66% o rentwyr yn y sector rhentu preifat neu gymdeithasol (o gymharu â 47% o bobol sy’n berchen ar eu tai).
- 74% o bobol sydd ar ei hôl hi â biliau ar y funud.
‘Effaith hirhoedlog’
Mae’r elusen yn galw ar Lywodraeth y Deyrnas Unedig i weithredu ar unwaith er mwyn helpu aelwydydd, gan gynnwys drwy gynyddu budd-daliadau er mwyn cyd-fynd â’r argyfwng costau byw.
Dywedodd Luke Young, Cyfarwyddwr Cynorthwyol Cyngor ar Bopeth Cymru: “Rydyn ni wedi canu’r larwm ynghylch y don o ddyled ynni fydd yn hyrddio tuag atom ym mis Hydref, ac rydyn ni’n gobeithio bod y rhai sy’n gwneud y penderfyniadau yn gwrando o’r diwedd.
“Mae pobol yng Nghymru, a thros y Deyrnas Unedig, yn cael trafferth cael deupen llinyn ynghyd yn barod.
“Mae ein hymchwil yn dangos y caledi ychwanegol sy’n wynebu teuluoedd â phlant, pobol ag anableddau, a rhentwyr.
“Er bod yr argyfwng costau byw yn effeithio ar ystod eang o aelwydydd, y rhai ar incymau isel sydd am ddioddef waethaf.
“Bydd lefelau cynyddol o dlodi a dyled yn cael effaith hirhoedlog ar fywydau pobol. Os bydd plentyn yn oer neu’n llwglyd dros y gaeaf, fyddan nhw byth yn gallu anghofio hynny.”
