Mae siop lyfrau Gymraeg y Bala yn dathlu ei phen-blwydd yn hanner cant y mis yma.
Cafodd cwmni Awen Meirion ei sefydlu gan 11 o gyfarwyddwyr yn 1971, bedair blynedd ar ôl i siop Gymraeg gyntaf Cymru, Siop y Pethe, agor yn Aberystwyth.
Agorodd y siop ei hun flwyddyn yn ddiweddarach, dan arweiniad gwirfoddolwyr am y flwyddyn cyn i Alan Llwyd ddod yn rheolwr cyntaf arni, gan werthu llyfrau Cymraeg a llyfrau am Gymru, cardiau, crefftau a cherddoriaeth.
Mae’r busnes yn “lwcus iawn” i fod mewn sefyllfa i ddathlu’r hanner cant, meddai Gwyn Siôn Ifan, rheolwr gyfarwyddwr Awen Meirion, ond mae hi dal yn “her” mynd am y cerrig milltir nesaf.
“Mae hi’n grêt, wrth gwrs, ein bod ni wedi cyrraedd hanner cant ond mae hi dal yn her i fynd am yr hanner cant ac un, hanner cant a dau…” meddai Gwyn Siôn Ifan, sy’n rheolwr gyfarwyddwr ar y siop ers 1990, wrth golwg360.
“Dydy’r rhifau yna ddim yn golygu gymaint â hynny, cynnal y siop sy’n bwysig.
“Rydyn ni’n lwcus iawn ein bod ni mewn sefyllfa i ddathlu’r hanner cant oed.
“Roedden ni’n poeni’n ofnadwy dros gyfnod y Covid, beth fyddai parhad Awen Meirion, be ydy’r cam nesaf, ond ddaethon ni drwyddi a thrwyddi yn iach ac rydyn ni mewn sefyllfa i fynd i’r Eisteddfod unwaith eto.
“Gobeithio y byddan ni’n parhau i allu mynychu pethau fel yr Eisteddfod.”
Dathliadau
Dros y blynyddoedd, mae Awen Meirion wedi bod yn croesawu awduron a chantorion, gan gynnwys Bryn Fôn, Manon Steffan Ros, Dewi Prysor a Dai Jones Llanilar, i’r siop i gynnal sesiynau arwyddo.
Does yna ddim byd pendant wedi’i drefnu er mwyn dathlu’r hanner cant eto, ond mae Gwyn Siôn Ifan wedi bod yn trafod efo cerddorion ac awduron a bydd yna ddigwyddiadau yn cael eu cynnal dros y flwyddyn.
“Dyddiau yma, dydyn ni ddim yn gwneud cymaint o sesiynau arwyddo, mae’r ddwy flynedd ddiwethaf wedi amharu peth ar hynna ond rydyn ni rŵan yn trio datblygu sesiynau lansio ac arwyddo’n ôl,” esbonia.
“Gan ein bod ni yn y flwyddyn yma’n dathlu hanner can mlynedd, mae o’n rheswm da dros ailgychwyn pethau unwaith eto.
“Rhoi adloniant stepen drws tu allan i’r siop, yn dibynnu ar y tywydd, ambell gyngerdd, a gobeithio trefnu ymryson yn nes at y gaeaf.
“Mewn gwirionedd, rhoi adloniant sy’n adlewyrchu be rydyn ni’n ei wneud ac rydyn ni’n edrych ymlaen at gynnal digwyddiadau pellach.”
‘Mewn dwylo sâff’
Mae Awen Meirion newydd gyflogi aelod newydd o staff, sy’n golygu bod yna dri yn gweithio yno bellach.
“Mae hynny’n newyddion da oherwydd mae’n golygu ein bod ni mewn sefyllfa i allu cyflogi’n ychwanegol, ac felly gael syniadau newydd a rhannu syniadau ynghylch sut i yrru’r siop yn ei blaen a chreu mwy o amrywiaeth gobeithio,” meddai Gwyn Siôn Ifan wrth edrych tua’r dyfodol.
“Mae medru cyflogi’r tri ohonom ni yn gam pwysig ymlaen i ni er mwyn sicrhau dyfodol y cwmni pan fydda i wedi ymddeol.
“Bydd y siop mewn dwylo saff, yn sicr o hynny, yn enwedig efo’r cydweithwyr rŵan.
“Mae dyfodol Awen Meirion yn sicr.”
- Mwy am Awen Meirion yn dathlu’r hanner cant yn golwg yn fuan.
