Mae ffatri gaws newydd ar Ynys Môn wedi derbyn sylw rhyngwladol cyn yr agoriad yn y gwanwyn.
Bydd y datblygiad gwerth £20m gan gwmni Mona Dairy yn gweld 7,000 tunnell o gaws Cymreig a chyfandirol yn cael ei gynhyrchu bob blwyddyn.
Wedi ei sefydlu ar safle 25,000 troedfedd sgwâr, fe fydd y ffatri newydd ym Mharc Diwydiannol Mona ger Gwalchmai yn un o’r rhai mwyaf modern yn Ewrop.
Fel rhan o’r datblygiad, bydd 100 o swyddi’n cael eu creu i gyd, ac fe fydd yn gyfleuster carbon niwtral sy’n rhedeg yn llwyr ar ynni adnewyddadwy.
‘Gosod safonau newydd’
Ychydig wythnosau ar ôl llofnodi cytundeb masnach gyda’r Deyrnas Unedig, fe wnaeth llysgennad o Awstralia ymweld â’r ffatri yn ddiweddar gydag Aelod Seneddol yr ynys, Virginia Crosbie.
Fe wnaeth George Brandis, Uwch Gomisiynydd Awstralia i’r Deyrnas Unedig, longyfarch y datblygwyr am ddod â’r cynllun yn fyw.
“Un o enillwyr mawr y cytundeb masnach hwn yw’r sector bwyd wedi’i brosesu,” meddai.
“Bydd cawsiau Cymreig sy’n cael eu cynhyrchu o laeth fferm o Gymru yn un o’r rhai sy’n buddio o’r fargen, felly mae cyfleoedd ar gael i’w manteisio arnynt.”
Ychwanegodd yr Aelod Seneddol Virginia Crosbie y byddai’r cwmni yn “gosod safonau newydd ar gyfer y diwydiant ledled y byd”, a’i bod hi’n “aruthrol” gweld menter flaenllaw a chynaliadwy yn datblygu ar yr ynys.
Arloesi
Arweinydd y datblygiad a Rheolwr Gyfarwyddwr Mona Dairy yw Ronald Akkerman o’r Iseldiroedd.
Dywed y bydd y prosiect yn plethu dulliau traddodiadol ac arloesol i gynhyrchu cawsiau Iseldireg fel Edam a Gouda, yn ogystal â chawsiau artisan sy’n defnyddio llefrith lleol.
“Y ffatri hon yw’r datblygiad mwyaf yn y sector bwyd yn ddiweddar ac mae’n denu llawer iawn o ddiddordeb o bob rhan o’r diwydiant yn fyd-eang,” meddai.
“Mae’n gyffrous iawn gallu tywys pobol o amgylch y ffatri nawr gan ei bod ar fin cael ei chwblhau.
“Rydyn ni’n diolch i Mr Brandis a Mrs Crosbie am ddod i weld drostyn nhw eu hunain pa mor arloesol yw hwn i ni, y rhanbarth a’r sector llaeth.”
Gwerthoedd y cwmni
Yn ôl Ronald Akkerman, egwyddorion craidd Mona Dairy yw cynnig bargen well, deg a thryloyw i ffermwyr, gan ddatblygu safonau cynaliadwy ac ecogyfeillgar yn eu harferion.
“Rydyn ni eisiau gwneud hyn oherwydd nid yn unig ei fod yn hanfodol i’r amgylchedd, mae yna hefyd lawer mwy o alw gan ddefnyddwyr am frandiau sydd â safonau cynaliadwy,” meddai.
“Fe allwn ni gyflawni hynny, gan fod ein cyfleuster cynhyrchu mewn sefyllfa dda i roi mantais gystadleuol fyd-eang i’r cynhyrchion sy’n cael eu creu yma.
“Mae’n gyfnod cyffrous i ni ac i’r diwydiant, a dydyn ni ddim yn gallu aros i’r broses ddechrau.”
