Cyngor Gwynedd yn cynnig cyflwyno gwasanaethau bws trydanol

Mae Cyngor Gwynedd, mewn partneriaeth gyda Chyngor Conwy, wedi cyflwyno cynnig “cyffrous” ac “arloesol” er mwyn cyflwyno gwasanaethau bws TrawsCymru trydanol.

Byddai’r cynllun newydd yn cysylltu Caernarfon, Porthmadog a Blaenau Ffestiniog, a Blaenau Ffestiniog, Llanrwst, a Llandudno, gyda bws trydan lleol ar gyfer ardal Blaenau Ffestiniog.

Yn ôl Cyngor Gwynedd mae’r prosiect yn adeiladu ar argymhellion Strategaeth Cerbydau Allyriadau Isel TrawsCymru, ac yn cyd-fynd â thargedau amgylcheddol Llywodraeth Cymru.

Mae’r bartneriaeth wedi cyflwyno cais cynllunio i greu safle newydd i gadw’r bysus trydanol yn Nhanygrisiau, safle sy’n faes parcio ar hyn o bryd.

“Arloesol”

“Mae Cyngor Gwynedd mewn partneriaeth â Chyngor Conwy yn falch o gyflwyno cynnig cyffrous ac arloesol i gyflwyno gwasanaethau bws TrawsCymru fydd yn gwbl drydanol ar lwybr dan gytundeb,” meddai llefarydd ar ran Cyngor Gwynedd wrth golwg360.

“Mae’r cynnig hwn yn dilyn dros ddeuddeg mis o waith cynllunio manwl gan y Cyngor, mewn partneriaeth â Transport for Wales a TrawsCymru, sy’n ceisio cryfhau ansawdd ac atyniad cysylltiadau gwasanaeth bysiau allweddol.

“Mae’r prosiect hefyd yn adeiladu ar argymhellion Strategaeth Cerbydau Allyriadau Isel TrawsCymru, sy’n nodi map ffordd ar gyfer trosi fflyd TrawsCymru i dechnoleg allyriadau isel erbyn 2028 yn unol â thargedau amgylcheddol ehangach Llywodraeth Cymru.

“Mae’r bartneriaeth wedi cyflwyno cais cynllunio i greu safle newydd i gadw’r bysys trydan yn Nhanygrisiau. Y bwriad yw i gynnal gwasanaeth bws trydan rhwng Caernarfon – Blaenau Ffestiniog, a Blaenau Ffestiniog – Llandudno.

“Bydd y cynllun yn rhoi cyfle i dreialu’r defnydd o fysys trydan ar dirwedd heriol Gogledd Cymru,” meddai Cyngor Gwynedd.

“Mae’r holl waith paratoi yn addawol, ac rydym yn edrych ymlaen at groesawu’r dechnoleg newydd yma i’r ardal.”