Mae cerdd newydd gan y prif fardd Ifor ap Glyn yn cofnodi’r heriau y mae busnesau yng Nghymru wedi’u hwynebu yn ystod y flwyddyn ddiwethaf, a’r gwaith caled a wnaed gan staff i gefnogi a helpu mentrau i addasu er mwyn gweithredu yn ystod y pandemig.
Comisiynwyd y gerdd – ‘Yr Awen Fusnes’ – gan gwmni Menter a Busnes er mwyn cofnodi’r argyfwng cenedlaethol ac ymdrechion i helpu busnesau Cymru i oresgyn ar ffurf cerdd ar gyfer y dyfodol.
Eglurodd Alun Jones, Prif Weithredwr Menter a Busnes fod cynnydd wedi bod yn nifer y busnesau sydd yn chwilio am gyngor yn ystod y pandemig.
“Mae Covid-19 wedi golygu ein bod ni, fel llawer o gwmnïau ledled Cymru, wedi gorfod addasu er mwyn gallu helpu ein cleientiaid yn ystod yr amser hwn,” meddai.
“Mae Ifor ap Glyn wedi llwyddo i gyfleu’r heriau rydyn ni wedi’u hwynebu fel cwmni yn y gerdd Yr Awen Fusnes.
“Mae bellach yn gofnod o sut y gwnaethom ni ymateb yn ystod y cyfnod digynsail yma.”
‘Dathlu entrepreneuriaeth Cymru’
Diolchodd Ifor ap Glyn am gefnogaeth Menter y Busnes ac am y cyfle i lunio’r gerdd.
“Mae bob amser yn bleser dathlu entrepreneuriaeth Cymru,” meddai.
“Mae ei angen arnom nawr yn fwy nag erioed, yn lleol ac yn genedlaethol.
“Diolch i chi, Menter a Busnes am eich holl anogaeth a chymorth i’r perwyl hwnnw!”
Yr Awen Fusnes
Canmolwn yn awr yr awen fusnes,
y llais sydd heb eto fagu eco,
y gân fawr sydd dal ym mrest aderyn bach.
A defnyddiwn ddyddiau’r dwymyn
i fyfyrio’r ail-gychwyn,
i fapio’r posibiliadau,
mynychu gweminarau,
cael ein mentora,
rhag i’r busnes newydd fynd yn rhacabobus,
rhag i’r hwch ddod ar gyfyl y siop.
Canys gweddw pob cychwyn
heb gymorth yn gefen…
ond ‘ceisiwch, a chwi a gewch’,
a dyna’n wir a gawn,
o ben arall y ffôn
neu hyd bys bant, ar y we;
dyma’r allwedd i lwyddo’n lleol.
Ac wrth hogi sgiliau
a meithrin cysylltiadau
cawn gywain profiadau newydd
i’r hen sguboriau;
mae’r awen fusnes fel arwain cân newydd
gydag eco soniarus yn dilyn ein llais.
Ifor ap Glyn
