Clawr cylchgrawn Lol y llynedd
Honiad am gynllwyn gwleidyddol i danseilio cwmni menter yw prif stori’r 50fed rhifyn o’r cylchgrawn dychan a sgandal, Lol.
Mae’n ailadrodd honiadau a rhoi rhagor o fanylion am fethiant cwmni o’r enw Ideoba, a oedd wedi ei sefydlu gan ddau bartner oedd yn cynnwys gwleidydd Plaid Cymru, Adam Price.
Yn ôl erthygl yn y cylchgrawn, y Blaid Lafur oedd wedi atal rhoi benthyciad a allai fod wedi achub y cwmni oherwydd bod Adam Price yn sefyll yn eu herbyn yn etholiadau’r Cynulliad.
‘Gwirion’ meddai’r Llywodraeth
Pan wnaed yr honiadau gynta’ ym mis Mai gan y partner arall, Andrew Auerbach, roedd y Llywodraeth wedi mynnu bod yr honiadau’n “wirion”.
Roedd y Llywodraeth wedi rhoi arian at sefydlu Ideoba yn y lle cynta’ ac roedd y Gweinidog Economi, Edwina Hart, yn rhan o’r lansio.
Honiad Lol yw bod ‘Taffia’ Llafur wedi ymyrryd i rwystro benthyciad pellach. Ond, pan alwodd y Ceidwadwyr am ymchwiliad, fe wfftiodd y Llywodraeth yr honiadau.
Lol – y cefndir
Cwmni Drwg yw enw cyhoeddwyr Lol erbyn ond mae’n cael ei argraffu gan y cyhoeddwyr gwreiddiol, Gwasg y Lolfa.
Fe fydd y wasg yn cyhoeddi llyfr i ddathlu hanner can mlwyddiant y cylchgrawn yn yr hydref.
Fe gafodd ei lansio yn Sir Drefaldwyn, yn Eisteddfod y Drenewydd yn 1965.
