Mae Cyngor Sir Powys wedi cyhoeddi bod eu hwb aml-asiantaethol newydd ym Mharc Menter Aberhonddu wedi’i gwblhau.
Mae’r hwb, oedd yn ganolfan alwadau segur yn wreiddiol, bellach yn cael ei alw’n Dŷ Brycheiniog.
Bydd yn cael ei ddefnyddio gan y Cyngor a sawl sefydliad arall.
‘Adeilad mwy ymarferol, cost-effeithiol, a chynaliadwy’
Mae’r datblygiad yn rhan o brosiect sydd wedi’i ariannu drwy gyllid gwerth £3.5m gan Lywodraeth y Deyrnas Unedig.
Cafodd yr arian ei sicrhau gan Wasanaeth Economi a Hinsawdd Cyngor Sir Powys.
Yn ystod y broses, roedd cyfle am swydd i brentis ar y safle, ac fe groesawodd Tŷ Brycheiniog fyfyrwyr gwaith coed o Goleg Bannau Brycheiniog.
Yn rhan o’r gwaith adnewyddu, mae Beacons Business Interiors wedi gosod lifft a deunyddiau di-garbon neu gynaliadwy yn yr adeilad.
“Mae’r datblygiad hwn wedi creu adeilad mwy ymarferol, cost-effeithiol i’r cyngor ei ddefnyddio yn y rhan hon o’r sir, gan wneud ein darpariaeth o wasanaethau yn fwy cynaliadwy ar gyfer cenedlaethau’r dyfodol,” meddai’r Cynghorydd Jake Berriman, yr Aelod Cabinet â chyfrifoldeb dros gynllun Powys Gysylltiedig.
“Mae hefyd yn ein helpu i leihau ein hôl troed carbon.”
‘Cynnal perthnasoedd cadarnhaol’
Bydd y llawr cyntaf newydd ar gael i wahanol asiantaethau o’r sectorau cyhoeddus, preifat a gwirfoddol.
Bydd yr ail lawr yn cael ei ddefnyddio fel swyddfa ar gyfer staff y Cyngor.
“Bydd symud i’r amgylchedd gwaith newydd, mwy hyblyg hwn yn ein helpu i gynnal perthnasoedd cadarnhaol gyda’n partneriaid a rhyddhau safle datblygu y mae mawr ei angen yn Aberhonddu, yn Neuadd Brycheiniog ar Ffordd Cambria,” meddai’r Cynghorydd David Selby, sydd â chyfrifoldeb dros gynllun Powys Fwy Llewyrchus.
Mae disgwyl i staff y Cyngor symud o’u swyddfeydd presennol yn Neuadd Brycheiniog i’r swyddfa newydd yn gynnar yn 2025.
