Bydd dros £450,000 yn cael ei wario i ddiogelu strydoedd Rhondda Cynon Taf.
Mae Comisiynydd Heddlu De Cymru, Alun Michael wedi sicrhau buddsoddiad gwerth £457, 543 o gronfa’r Swyddfa Gartref sydd â ffocws ar wneud strydoedd yn fwy diogel yng Nghymru a Lloegr.
Bydd yr arian yn cael ei ddefnyddio i gyflwyno mwy o gamerâu cylch cyfyng a mwy o oleuadau mewn pedair ardal yn Rhondda Cynon Taf, sef: Canol dref Pontypridd, Parc Beddau, Yr Ynys ac Ystâd Cae Fardre.
Hyder
Yn ôl Mr Michael, sy’n gyn-brifweinidog Cymru, mae’r mesurau hyn yn bwysig i sicrhau bod merched yn teimlo’n hyderus wrth gerdded strydoedd yr ardal.
“Trwy weithio mewn partneriaeth, rydym yn canolbwyntio ar fanteision uniongyrchol o weithredu mesurau fel camerâu cylch cyfyng gan sicrhau gwelliannau hirdymor cynaliadwy o ran diogelwch a hyder menywod a merched,” meddai Alun Michael.
Dywedodd Arweinydd Cyngor Rhondda Cynon Taf, y Cynghorydd Andrew Morgan fod “diogelwch ein trigolion bob amser yn peri gofid mawr i’r cyngor a chroesawn unrhyw fesur i gynyddu eu diogelwch.”
Mae derbynwyr cyllid wedi cyflwyno ceisiadau am gynlluniau arloesol i gynyddu diogelwch mannau cyhoeddus, gan gynnwys prosiectau sy’n pwysleisio newid agweddau ac ymddygiad at fenywod mewn cymunedau lleol.
Gogledd Cymru
Mae Swyddfa Gomisiynydd Heddlu Gogledd Cymru wedi nodi ei llwyddiant o ennill cyllid gan y Swyddfa Gartref.
Ar eu cyfrif Twitter mae’r llu yn nodi eu bod yn lansio cynllun yn benodol ar gyfer diogelwch menywod yn ardaloedd Wrecsam a Sir y Fflint.
Bydd £202,703 yn cael ei glustnodi ar gyfer datblygu cynlluniau ar gyfer ‘Blismona Ataliol’ sy’n golygu eu bod am fynd i’r afael ag achosion y troseddu.
Yn ogystal fe fydd datblygiadau ar fesurau trafnidiaeth gyheoddus i’w gwneud yn fwy diogel yn ogystal â chynlluniau i wella addysg ac ymwybyddiaeth.
Hyd yma, mae’r awdurdodau canlynol wedi derbyn buddsoddiad gan y Swyddfa Gartref:
- Dyfed Powys: £155,442.881
- Gwent: £673,181.322
- Gogledd Cymru: £336,759.501
- De Cymru: 457,543.001
