Mae pris cyfartalog am dŷ yn y Deyrnas Unedig wedi pasio £250,000 am y tro cyntaf erioed.
Y pris cyfartalog ym mis Hydref eleni oedd £250,311, a oedd yn gynnydd o 9.9% ar y flwyddyn flaenorol, yn ôl Cymdeithas Adeiladu’r Nationwide.
Mae hefyd yn gynnydd o £30,728 ers i’r pandemig ddechrau ym mis Mawrth 2020.
Galw uchel
Dywedodd uwch economegydd Nationwide, Robert Gardner, fod y galw am dai wedi parhau’n uchel, er i’r toriad ar dreth stamp ddod i ben ym mis Medi.
“Fe arhosodd nifer y ceisiadau morgais yn gadarn ar 72,645 ym mis Medi, fwy na 10% yn uwch na’r cyfartaledd misol a gafodd ei gofnodi yn 2019,” meddai.
“O gyfuno hynny â diffyg cartrefi ar y farchnad, mae hyn yn helpu i egluro pam mae twf prisiau wedi aros yn gadarn.
“Mae’r rhagolygon yn parhau i fod yn hynod ansicr. Os yw’r farchnad lafur yn parhau i fod yn wydn, gall amodau aros yn weddol fywiog yn ystod y misoedd nesaf.
“Fodd bynnag, mae nifer o ffactorau yn awgrymu y gallai gweithgaredd y farchnad arafu.
“Mae’n parhau i fod yn aneglur sut y bydd yr economi ehangach yn ymateb wrth i fesurau cymorth y Llywodraeth gael eu tynnu yn ôl.
“Hefyd, mae hyder prynwyr wedi gwanhau yn ystod y misoedd diwethaf, yn rhannol o ganlyniad i gynnydd sydyn yng nghostau byw.”
