Mae’r Ceidwadwyr Cymreig yn galw ar Lywodraeth Cymru i agor canolfannau galw i mewn er mwyn cynyddu nifer y bobol sy’n derbyn dos atgyfnerthu o’r brechlyn Covid-19.
Daw’r alwad ar ôl i ganolfannau galw i mewn gael eu hagor yn Lloegr i roi brechlyn atgyfnerthu i grwpiau penodol.
Mae’r grwpiau hynny’n cynnwys preswylwyr cartrefi gofal, gweithwyr iechyd a gofal rheng flaen, y rheiny sydd â chyflyrau iechyd gwaelodol, a phob oedolyn dros 50 oed.
Mae Russell George, llefarydd iechyd yr wrthblaid, yn ofni y byddai peidio â gwneud hynny yng Nghymru yn rhoi’r Gwasanaeth Iechyd dan bwysau dros y gaeaf.
Galwadau
Er bod llawer o bobol wedi derbyn y cynnig am y dos cyntaf a’r ail ddod o’r brechlyn Covid-19, mae niferoedd ar gyfer y trydydd dos yn is.
Erbyn Hydref 31, roedd Cymru wedi rhoi brechlyn atgyfnerthu i 454,530 o bobol, neu 16.5% o bobol dros 12 oed.
Wrth ymateb i’r niferoedd hynny, mae Russell George yn dweud ei fod yn bryderus.
“Mae’r rhaglen frechu wedi bod yn llwyddiannus iawn ledled y Deyrnas Unedig,” meddai.
“Ond mae darpariaeth y pigiad atgyfnerthu yn peri pryder i fi.
“Rwy’n credu y byddai’r niferoedd yn llawer uwch pe na fyddai’n rhaid i bobol aros i gael eu gwahodd, ac yn lle, eu bod nhw’n cael yr opsiwn o ganolfannau galw i mewn.
“Yn y cyfamser, mae pobol yn Lloegr yn gallu cerdded i mewn i ganolfan ar gyfer eu pigiad atgyfnerthu ond dydy pobol yng Nghymru ddim yn gallu gwneud hynny.
“Gobeithio y bydd y Gweinidog yn newid ei meddwl ac yn gweithredu ar frys ar ein galwadau rhesymol ni.”
