Mae’r gwasanaeth Profi ac Olrhain yn gofyn i rai pobol sydd wedi cael prawf Covid-19 negatif ers 4 Hydref i gael prawf arall.
Daw hyn ar ôl i labordy gwirio profion yn Lloegr roi canlyniadau prawf anghywir i bobol oherwydd “problemau technegol.”
Roedd pryderon wedi codi ar ôl i bobol gael canlyniadau profion PCR negatif yn syth ar ôl cael canlyniadau profion llif unffordd positif.
Mae’n debyg bod tua 4,000 o bobol yng Nghymru wedi eu heffeithio gan hyn yn ôl Llywodraeth Cymru, a tua 39,000 o bobol yn Lloegr.
Roedd y mwyafrif o’r canlyniadau diffygiol yng Nghymru wedi eu rhoi i bobol yn ardaloedd byrddau iechyd Gwent a Chwm Taf Morgannwg rhwng 8 Medi a 12 Hydref.
Yn dilyn y gwallau, mae profi yn y labordy yn Wolverhampton wedi cael ei ohirio am y tro, tra’u bod nhw dan ymchwiliad.
Bydd Llywodraeth Cymru nawr yn annog pobol i brofi eu hunain eto, yn cynnwys cysylltiadau agos sy’n dangos symptomau, a phawb sydd wedi cael prawf wedi ei brosesu yn y labordy rhwng 8 Medi a 4 Hydref.
Ymateb y Gweinidog Iechyd
Fe wnaeth y Gweinidog Iechyd Eluned Morgan gadarnhau bod y broblem yn eithriadol, ac mai dim ond y labordy yn Wolverhampton sydd wedi effeithio ar y profion.
“Fy mhryder uniongyrchol yw’r wybodaeth a’r cymorth i drigolion Cymru yr effeithir arnynt,” meddai.
“Rwyf wedi gofyn i Iechyd Cyhoeddus Cymru ddarparu cymorth a chyngor ychwanegol i’r byrddau iechyd yr effeithir arnynt yn ychwanegol at negeseuon cyfathrebu UKHSA.
“Byddant hefyd yn asesu effaith bosibl y digwyddiad hwn ar gyfraddau achosion ac adroddiadau epidemioleg i Gymru.
“Byddwn yn parhau i weithio’n agos gydag UKHSA a gwasanaeth Profi ac Olrhain y Gwasanaeth Iechyd ar y canfyddiadau a’r camau gweithredu sydd eu hangen a byddaf yn rhoi’r wybodaeth ddiweddaraf i’r aelodau am ddatblygiadau.”
