Mae Castell Gwrych, sy’n cael ei ddefnyddio fel safle’r rhaglen I’m A Celebrity… Get Me Out Of Here! wedi cael ei fandaleiddio.
Digwyddodd hyn ar y diwrnod olaf cyn trosglwyddo’r castell i gynhyrchwyr y rhaglen.
Mae rhaglen realiti ITV yn dychwelyd i Gastell Gwrych am yr ail flwyddyn yn olynol ar ôl i’r pandemig orfodi cynhyrchwyr i ganslo cynlluniau i ffilmio yn Awstralia.
Dywedodd neges ar gyfrif Twitter y castell: “Fe wnaeth ein diwrnod olaf ein hatgoffa pa mor bell rydyn ni wedi dod, ond hefyd faint sydd angen ei wneud dros y blynyddoedd nesaf.
“Roedd yn drueni mawr gweld bod rhywun wedi difrodi un o’r bylchfuriau sydd wedi’i hadferu ar y lawnt ddwyreiniol ar ein diwrnod olaf.
“Mae hyn yn dangos y dasg enfawr sydd gennym o’n blaenau!”
Our final day reminded us how far we’ve come, but also how much we have left to do over the coming years.
It was a huge shame to see that somebody damaged one of the restored battlements on the east lawn on our last day. This goes to show the huge task we have ahead of us! pic.twitter.com/oAp1Gq26e3
— Gwrych Castle (@Gwrych_Castle) September 7, 2021
Dywedodd yr ymddiriedolaeth fod y castell wedi cael ei effeithio gan ymosodiadau tân, fandaliaeth a phobol yn lladrata yn y gorffennol.
“Difrodi”
“Credwn ei bod yn bwysig bod pobol yn ymwybodol, hyd yn oed yn yr 21ain ganrif, fod tirnodau hanesyddol yn dal i gael eu difrodi a’u gadael i ddirywio,” meddai cynrychiolydd ar ran yr ymddiriedolaeth.
Fe gadarnhaodd y castell ei fod ar gau i’r cyhoedd ddydd Sul (5 Medi) oherwydd y rhaglen ITV ac na fyddai’n ailagor tan 2022.
