Mae dyn wedi osgoi cyfnod hirach o garchar am stelcian am nad oedd ei ddioddefwr yn ymwybodol o’r drosedd, yn ôl adroddiadau BBC Cymru.
Maen nhw’n dweud bod y Dr Ian Hutchinson wedi’i ‘siomi gan y gyfraith’ ar ôl clywed y bydd Thomas Baddeley, 42, yn cael ei ryddhau o’r carchar ar ôl cael ei ddedfrydu.
Uchafswm o chwe mis o garchar yw’r gosb yr oedd modd i’r barnwr ei rhoi yn ddedfryd am y drosedd yn yr achos yma.
Roedd y deintydd o’r farn y byddai’n cael gwybod pryd y byddai Thomas Baddeley yn cael ei ryddhau, ac roedd yn disgwyl i hynny ddigwydd yn ystod yr wythnosau nesaf.
Dywedodd y Weinyddiaeth Gyfiawnder nad oedd Dr Ian Hutchinson yn gymwys i fod yn rhan o gynllun lle mae dioddefwyr yn cael gwybod pan fod troseddwr yn cael ei ryddhau.
Dim ond dioddefwyr troseddau rhywiol neu dreisgar, lle caiff y troseddwr ei ddedfrydu i 12 mis neu fwy, sy’n gymwys ar gyfer y Cynllun Cyswllt Dioddefwyr.
Dywedodd Dr Ian Hutchinson wrth BBC Cymru ei fod yn teimlo’n ddig gyda’r system ac mae wedi galw am newidiadau i’r gyfraith.
Cefndir
Cafodd Thomas Baddeley ei drin gan Dr Ian Hutchinson yn ei hen bractis deintyddol ym Mryste rhwng 2012 a 2016.
Cafodd dynnu rhai o’i ddannedd ac fe gafodd brês ei osod, ond honnodd fod y driniaeth wedi ei wenwyno.
Er bod Dr Ian Hutchinson yn disgwyl cwyn am y driniaeth, chlywodd e ddim byd pellach wedyn.
Cafodd Thomas Baddeley ei arestio o fewn milltir i gartref Ian Hutchinson ger Cas-gwent fis Tachwedd y llynedd.
Fe wnaeth swyddogion ganfod bwa croes, mwgwd a chyllell gegin wedi’u cuddio yn ei gar, ac roedd deunydd plastig yn gorchuddio tu fewn y car.
Daeth yr heddlu o hyd i dystiolaeth ei fod wedi bod yn dilyn Dr Ian Hutchinson am bedair blynedd.
Ym mis Awst, plediodd Thomas Baddeley yn euog yn Llys y Goron Caerdydd i gyhuddiad o stelcian heb godi ofn, braw na gofid, a dwy drosedd ychwanegol o feddu ar arfau.
