Adroddiadau bod tri wedi’u trywanu yn farw yn Glasgow

Mae dyn wedi cael ei saethu’n farw gan swyddogion yn dilyn yr hyn mae’r heddlu’n ei alw’n “ddigwyddiad” yn Glasgow.

Mae adroddiadau’n awgrymu bod y dyn yma wedi trywanu tri pherson yn farw ar risiau gwesty yng nghanol y ddinas.

Yn ôl Ffederasiwn Heddlu’r Alban, cafodd heddwas ei drywanu, ac mae yna blismyn o hyd y tu allan i Park Inn, Stryd West George. Mae chwe pherson arall yn yr ysbyty.

Mae datganiad gan Heddlu’r Alban yn dweud bod y sefyllfa “dan reolaeth”, a bod dim bygythiad i’r cyhoedd.

“Ofnadwy”

“Mae’r adroddiadau o Ganol Dinas Glasgow yn ofnadwy,” meddai Nicola Sturgeon, Prif Weinidog yr Alban. “Dw i’n cydymdeimlo â phawb sydd wedi bod ynghlwm â hyn.

“Helpwch y gwasanaethau brys i wneud eu swyddi trwy gadw draw o’r ardal – a plîs peidiwch â rhannu gwybodaeth sydd heb ei gadarnhau.”