[boddwyd 27 o bobol, gan gynnwys plant a merched beichiog, wrth iddynt ffoi dros y sianel i Brydain]
Ar gyfer heddiw’r bore
rhown y byd yn ei le a gloywi
tŷ â cholfen eleni.
Yn ei gwres cynheswn
ein hesgyrn. Gwisgwn
facyn gwyn yn gof
am ein gyddfau i gau’r gwynt
a’r poen allan drwy’r penillion.
Canwn ganeuon, cynigiwn newid
i’r drefn ac agor drws
i wynebau nad ydym yn eu ’nabod.
Rhannwn groeso eto yn ateb
o’n dwylo ni i deulu
mewn ffydd rhag i gymun ffoi
o’n calonnau a gadael celanedd.
Estynnwn law dros dwyni i lywio’r
cychod brau o’r tonnau taer,
sy’n llusgo eu dwylo i’r dwfn,
ac wylo’r gwynt sydd am geulo’r gwaed.
Trown draethau’r tir yn drothwy
gyda thorch, a gwnawn orchwyl
a bwrw mantell y bore’n
garthen lân arian rhag y niwl,
a rhoi gwres i gynhesu
ysgwyddau dan warrau oer.
Ar gyfer heddiw’r bore rhown y byd
eleni a’n calonnau’n
gyfan i’r baban bach.
