Dechrau’r Gemau Paralympaidd yn Tokyo

Aled Siôn Davies yn Rio — Aled Siôn Davies yng Ngemau Paralympaidd Rio de Janeiro

Mae’r Gemau Paralympaidd yn dechrau yn Tokyo heddiw (dydd Mawrth, Awst 24), a’r Cymro Aled Siôn Davies yw cyd-gapten tîm Prydain gyda Hannah Cockroft.

Eu cyd-athletwyr sydd wedi’u dewis nhw i arwain y tîm, sy’n arwydd o’r parch mawr atyn nhw yn y byd para-athletau.

Bydd Aled Siôn Davies yn amddiffyn ei deitl F63 taflu pwysau yn dilyn ei fuddugoliaeth yn Rio de Janeiro bum mlynedd yn ôl, tra bydd Cockroft yn cystadlu yn y ras 100m mewn cadair olwyn yn nosbarth T34.

“Mae’n anrhydedd lwyr cael fy newis yn gapten, yn enwedig gan aelodau fy nhîm,” meddai Davies.

“Dros y flwyddyn ddiwethaf, dw i wedi cael fy ysbrydoli gymaint gyda sut mae pawb wedi addasu, wedi esblygu ac wedi goresgyn cymaint o rwystrau.

“Y tîm hwn yw’r tîm para-athletau gorau yn y byd, mae pobol ein ofn ni ac yn ein hedmygu ni, felly fy neges i iddyn nhw yw ei amgyffred e, ei fwynhau e a gwneud eich hunain yn falch.”

Ellie Simmonds a John Stubbs yn cludo baner Prydain

Ellie Simmonds, y nofwraig a gafodd ei haddysg uwchradd yn Abertawe, a John Stubbs, y saethyddwr o Gwmbrân, fydd yn cludo baner Prydain yn y seremoni agoriadol.

“Mae Ellie a John, ill dau, yn esiampl o’r hyn mae’n ei olygu i fod yn athletwr ParalympicsGB,” meddai Penny Briscoe, chef de mission tîm Prydain.

“Mae eu rhagoriaeth ar y cae chwarae yn ogystal â’u gonestrwydd, eu harweiniad a’u hymrwymiad i’r tîm yn rhywbeth arbennig iawn.

“Dw i wrth fy modd y bydd Ellie a John yn cyd-gludo Baner yr Undeb ddydd Mawrth a does gen i ddim amheuaeth, drwy eu hesiampl, y byddan nhw’n ysbrydoli tîm ParalympicsGB cyfan i gyflawni pethau gwych dros y 12 diwrnod o gystadlu sydd i ddod.”

Y Cymry yn y Gemau

Dyma’r athletwyr o Gymru fydd yn cynrychioli Prydain:

David Phillips, 55 oed o Gwmbrân (saethyddiaeth)

John Stubbs, 56 oed o Sir Ddinbych (saethyddiaeth gyfansawdd agored)

Hollie Arnold, 27 oed o Grimsby (gwaywffon)

Olivia Breen, 25 oed o Guildford (naid hir a 100m T38)

Aled Siôn Davies, 30 oed o Gaerdydd (taflu pwysau F63)

Kyron Duke, 29 oed o Gwmbrân (taflu pwysau F41)

Sabrina Fortune, 24 oed o’r Wyddgrug (taflu pwysau F20)

Harri Jenkins, 25 oed o Gastell-nedd (100m T33)

Harrison Walsh, 25 oed o Abertawe (disgen F64)

David Smith, 31 oed o Abertawe (Boccia, BC1 a BC1/2 cymysg)