Mae teyrngedau wedi’u rhoi i Clive Everton, y sylwebydd snwcer, sydd wedi marw’n 87 oed.
Daw’r newyddion yn ystod yr wythnos pan fo’r chwaraewyr ym Mhencampwriaeth Snwcer Agored Prydain yn cystadlu am Dlws Clive Everton.
Ymhlith y rhai sydd wedi talu teyrnged iddo mae Eirian Williams, y dyfarnwr o Sir Gaerfyrddin.
Dywed mai Clive Everton “fwy na thebyg, yw’r sylwebydd gorau gafodd snwcer erioed”.
“Ges i lawer sgwrs gyda fe yn ystod fy mlynyddoedd ar y gylchdaith,” meddai.
“Cydymdeimladau â’i deulu ar yr adeg anodd hon.”
Clive Everton, one of snooker's greatest ever commentators and voice of the sport, has died at the age of 87.
Everton devoted his life to snooker and covered the some of the sport's most historic moments as a broadcaster and journalist. pic.twitter.com/JuI1VMnzQJ
— WST (@WeAreWST) September 27, 2024
Gyrfa
Bu Clive Everton yn gweithio i’r BBC am fwy na 30 o flynyddoedd ar ôl dechrau yn y 1970au.
Dechreuodd sylwebu ar snwcer i radio’r BBC yn 1972, pan enillodd Alex Higgins Bencampwriaeth y Byd am y tro cyntaf.
Daeth ei sylwebaeth gyntaf i’r teledu yn 1978.
Cyn hynny, bu’n chwaraewr amatur llwyddiannus, gan gyrraedd rownd gyn-derfynol Pencampwriaeth Biliards y Byd yn 1975 a 1977 – ar un adeg, roedd yn nawfed ar restr ddetholion y byd.
Roedd e hefyd yn chwaraewr tenis sirol i Swydd Gaerwrangon rhwng 1961 a 1974, ac roedd yn awdur llyfr Ann Jones, pencampwr Wimbledon yn 1969.
Fe hefyd oedd sylfaenydd y cylchgrawn Snooker Scene, a bu’n ei olygu am 51 o flynyddoedd.
Fe wnaeth e ohebu ar y byd tenis i The Times of India, rygbi i’r Sunday Telegraph, a phêl-droed i The Times.
Yn y byd sboncen, roedd yn hyfforddwr ar Jonah Barrington pan oedd yn rhif un yn y byd.
