Treviso 22–20 Scarlets


Doedd dau gais hanner cyntaf Andy Fenby ddim yn ddigon i sicrhau buddugoliaeth i’r Scarlets yn erbyn Treviso yn y Stadio di Monigo nos Sadwrn.

Tarodd yr Eidalwyr yn ôl yn yr ail hanner gan ennill y gêm gyda chic olaf y gêm, cic gosb o droed Alberto di Bernardo.

Hanner Cyntaf

Methodd Rhys Priestland gic gosb gynnar cyn llwyddo gyda gôl adlam i roi’r Scarlets ar y blaen.

Yna, daeth y cais agoriadol wedi ychydig llai na hanner awr o chwarae a thipyn o gais oedd o hefyd i Fenby, ymdrech unigol dda gan yr asgellwr i guro dau amddiffynnwr a thirio. 10-0 i’r Scarlets yn dilyn trosiad Priestland.

Tarodd Treviso’n ôl yn syth gyda chais i’r bachwr, Leonardo Ghiraldini, wedi i gic Gareth Davies gael ei tharo i lawr mewn safle peryglus.

Ond y Scarlets orffennodd yr hanner gryfaf gydag ail gais Fenby ac roedd hwn hyd yn oed yn well na’r cyntaf. Dangosodd sgiliau pêl droed gwych i lawr yr asgell chwith cyn tirio. Ychwanegodd Priestland y trosiad i roi deuddeg pwynt o fantais i’w dîm ar yr egwyl.

Ail Hanner

Ymestynnodd  Priestland y fantais honno gyda chic gosb ar ddechrau’r ail hanner ond yr Eidalwyr oedd piau’r hanner awr olaf.

Plymiodd yr eilydd fewnwr, Fabio Semenzato, dros y llinell gais cyn i’r eilydd faswr, di Bernardo, ychwanegu’r trosiad i ddod â Treviso o fewn wyth pwynt.

Yna tarodd yr wythwr, Robert Barbieri, gic Jordan Williams i lawr cyn cymryd ei gyfle yn dda i sgorio trydydd cais y tîm cartref a dim ond pwynt oedd rhwng y timau gydag ychydig dros ddeg munud ar ôl.

Bu rhaid i’r Scarlets chwarae’r rhan fwyaf o’r amser hwnnw heb Rob McCusker wedi i’r blaenasgellwr gael ei anfon i’r gell gosb am daflu dwrn, a chafodd y Cymry eu cosbi gyda chic olaf y gêm. Llwyddodd di Bernardo gyda mynydd o gic gosb o’r llinell hanner i ennill y gêm i’r tîm cartref.

Mae’r Scarlets felly yn disgyn i’r ail safle yn nhabl y Pro12 yn dilyn buddugoliaeth Ulster dros y Gleision nos Wener.

.

Treviso

Ceisiau: Leonardo Ghiraldini 29’, Fabio Semenzato 51’, Robert Barbieri 67’

Trosiadau: Alberto di Bernardo 51’, 67’

Cic Cosb: Alberto di Bernardo 80’

Scarlets

Ceisiau: Andy Fenby 27’, 37’

Trosiadau: Rhys Priestland 27’, 37’

Cic Cosb:Rhys Priestland 47’

Gôl Adlam: Rhys Priestland 13’

Cerdyn Melyn: Rob McCusker 72’