Dreigiau 5–16 Gleision

Cywirdeb wrth gicio at y pyst oedd y prif wahaniaeth rhwng y ddau dîm wrth i’r Gleision guro’r Dreigiau ar Rodney Parade yn y RaboDirect Pro12 nos Sadwrn.

Methodd Tom Prydie ambell gyfle i’r Dreigiau ond sgoriodd maswr ifanc y Gleision, Rhys Patchell 11 o 16 pwynt y Gleision wrth i’r tîm o’r Brifddinas ennill y gêm ddarbi yn gymharol hawdd yn y diwedd.

Hanner Cyntaf

Cicio gwael at y pyst oedd thema’r hanner awr agoriadol wrth i dri chiciwr ifanc fethu gyda’u cynigion cyntaf. Methodd Patchell i’r Gleision ac felly hefyd Prydie i’r Dreigiau cyn i Steffan Jones fethu hefyd i’r Dreigiau gyda chynnig llawer anoddach wrth iddi aros yn ddi sgôr tan funudau olaf yr hanner.

Fe ddaeth y pwyntiau cyntaf o’r diwedd dri munud cyn yr egwyl pan lwyddodd Patchell gyda’i ail gynnig ond y Dreigiau oedd ar y blaen ar yr egwyl diolch i gais Steffan Jones. Gwnaeth y blaenwyr y gwaith caib a rhaw a chroesodd y maswr ifanc o ddeg medr.

Methodd Prydie y trosiad ond roedd y Dreigiau ar y blaen o 5-3 ar yr egwyl.

Ail Hanner

Daeth y Dreigiau o fewn trwch blewyn i ychwanegu ail gais yn gynnar yn yr ail hanner ond barnodd y dyfarnwr teledu na chyrhaeddodd Phil Price y llinell gais. Ond roedd peth cysur i’r Dreigiau wrth i brop y Gleision, Nathan Trevett, dderbyn cerdyn melyn am drosedd yn ystod y digwyddiad.

Ond pedwar dyn ar ddeg y Gleision a sgoriodd nesaf gyda chais i Alex Cuthbert. Collodd y Dreigiau’r bêl yng nghanol y cae a llwyddodd Gavin Evans i ryddhau’r asgellwr i sgorio yn y gornel. Ychwanegodd Patchell y trosiad i roi’r Gleision ar y blaen o 10-5.

Methodd Prydie gyda chynnig arall at y pyst hanner ffordd trwy’r hanner a bu rhaid i’r Dreigiau dalu’n ddrud am fethu cyfleoedd felly wrth i Patchell sicrhau’r fuddugoliaeth i’r Gleision gyda dwy gic yn y pum munud olaf.

Ciciodd maswr y Gleision y pwynt bonws o afael y Dreigiau bedwar munud o’r diwedd cyn ychwanegu tri phwynt arall ddau funud yn ddiweddarach.

Buddugoliaeth i’r Gleision felly mewn gêm ddarbi ddigon diflas. Ac mae’r fuddugoliaeth honno yn eu codi i’r pumed safle yn nhabl y Pro12 tra mae’r Dreigiau’n disgyn i’r wythfed safle.

Seren y Gêm

Rhys Patchell oedd seren y gêm ac roedd y maswr ifanc wrth ei fodd ar y diwedd:

“Mae’n bleser cael [seren y gêm] ond ymdrech tîm oedd hi. Rydyn ni wedi gweithio’n galed trwy’r wythnos fel tîm, wedi trafod fel carfan sut i ennill a dyna ni wedi ei wneud. Ni mor falch ein bod wedi cael y fuddugoliaeth.”

Dreigiau

Cais: Steffan Jones 39’

Gleision

Cais: Alex Cuthbert 47’

Trosiad: Rhys Patchell 48’

Ciciau Cosb: Rhys Patchell 37’, 76’

Cerdyn Melyn: Nathan Trevett 44’