Nigel Davies
Mae’r Western Mail wedi datgelu bod Nigel Davies ar restr fer o dri dyn i fod yn hyfforddwr nesa’ tîm rygbi Caerloyw.
Mae Bryan Redpath wedi gadael Kingsholm i ymuno gyda’r Sale Sharks, ac mae Davies wedi dod i’r amlwg fel un o’r ffefrynnau i gymryd ei le.
Yn ymuno gyda Davies ar y restr fer mae cyn-hyfforddwr Abertawe, John Plumtree, a chyn-hyfforddwr Caerfaddon, Steve Meehan. Hefyd mae Dai Young, Lyn Jones a Kingsley Jones hefyd wedi eu cysylltu âr swydd.
Mae gan Nigel Davies naw mis ar ôl o’i gytundeb gyda’r Scarlets.
Bu’n brif hyfforddwr y rhanbarth ers 2008. Mae’r cyn-ganolwr rhyngwladol wedi creu argraff trwy ddatblygu tîm ifanc cyffrous gyda chyllideb gyfyngedig.
Ymhlith y chwaraewyr sydd wedi dod trwy rengoedd y Scarlets yn ystod teyrnasiad Davies mae George North, Jonathan Davies, Scott Williams a Rhys Priestland.
