Northampton 27–12 Scarlets

Mae’r Scarlets allan o’r Cwpan LV ar ôl colli yn y rwond gynderfynol yn erbyn Northampton ae Erddi Franklin’s brynhawn Sul. Roedd un cais ym mhob hanner yn ddigon i sicrhau’r fuddugoliaeth i’r tîm cartref ac er brwydro’n ddewr ni wnaeth Bois y Sosban fygwth llawer.

Hanner Cyntaf

Dechreuodd y Scarlets yn addawol iawn a bu bron i’r clo, Dominic Day, sgorio’r cais agoriadol wedi naw munud ond ni lwyddodd i dirio’r bêl yn ôl y dyfarnwr fideo.

Bu rhaid yn hytrach aros chwarter awr am y sgôr cyntaf ac roedd Northampton wedi dechrau dod i’r gêm erbyn hynny. Ffurfiodd eu pac sgarmes symudol o lein ymosodol a sgoriodd y prop, Alex Waller, gais cyntaf y prynhawn. Ychwanegodd Styphen Mayler y trosiad i roi mantais o saith pwynt i’r Seintiau.

Northampton oedd y tîm gorau yn awr a chawsant gic gosb hanner ffordd trwy’r hanner yn dilyn sgrym gryf. Trosodd Mayler y tri phwynt i ymestyn y fantais i ddeg pwynt.

Roedd y bwlch yn ôl i saith pwynt dri munud yn ddiweddarach yn dilyn trosedd yn y lein gan Northampton. Stephen Jones gyda’r gic, 10-3 wedi 23 munud.

Yna, cyfnewidiodd Mayler a Jones gic gosb yr un yn neg munud olaf yr hanner, 13-6 i’r tîm cartref ar yr egwyl.

Ail Hanner

Roedd y bwlch i lawr i bedwar wedi i tri munud o’r ail gyfnod wedi i Jones ychwanegu trydedd cic gosb i’r Cymry.

Ond roedd gan y Scarlets fynydd i’w ddringo bum munud yn ddiweddarach yn dilyn ail gais y Seintiau. Fe ailgylchodd y tîm cartref y bêl yn gyflym am sawl cymal yn ardal 22 medr y Scarlets a daeth y cyfle i’r asgellwr, Scott Armstrong, yn y diwedd aphlymiodd yntau dros y llinell yn y gornel chwith. Methodd Mayler y trosiad ond roedd gan y Saeson naw pwynt o fantais bellach.

Roedd y Scarlets yn ôl o fewn un sgôr wedi 53 munud wrth i berfformiad cicio di lychwin Jones barhau, 18-12 gydag ychydig llai na hanner awr ar ôl.

Ond adferodd Mayler y naw pwynt o fwlch toc cyn yr awr cyn ei ymestyn i 12 pwynt gydag un arall ddau funud wedi’r awr.

Gorffennodd y ddau dîm y gêm gyda phedwar dyn ar ddeg wedi i James Downey i Northampton a Day i’r Scarlets dderbyn cerdiau melyn. Ac i rhwbio halen yn y briw fe ychwanegodd yr eilydd faswr, Ryan Lamb, dri pwhynt arall wrth iddi orffen yn 27-12 o blaid y tîm cartref.

Dim rownd derfynol i’r Scarlets felly ond fe ddaw cyfle arall yn y Cwpan Amlin.