Lamont - Sgoriwr y Cais Cyntaf
Ulster 24–17 Scarlets
Bydd rhaid i’r Scarlets ddychwelyd i Gymru gyda dim ond pwynt bonws ar ôl colli yn erbyn Ulster yn Ravenhill nos Wener er iddynt fod ar y blaen o 10-0 yn gynnar yn y gêm. Sgoriodd bois y sosban ddau gais yn yr ugain munud cyntaf cyn gadael i Ulster daro’n ôl yn yr ail hanner.
Ceisiau Cynnar i’r Scarlets
Cafodd yr ymwelwyr o orllewin Cymru’r dechrau perffaith i’r gêm trwy sgorio’r cais cyntaf wedi dim ond dau funud o chwarae, Sean Lamont yn rhyng-gipio pas ar linell 22 medr Ulster ac yn croesi’r llinell gais i roi mantais gynnar i’r Scarlets. Methodd Stephen Jones y trosiad.
Ymestynnodd y Cymry eu mantais hanner ffordd trwy’r hanner gydag ail gais y gêm. Viliame Iongi oedd y sgoriwr y tro hwn, yr asgellwr newydd o Tonga yn gorffen yn dda yn dilyn pas hir effeithiol i’w ryddhau gan Adam Warren. Methodd Jones y trosiad unwaith eto.
Ulster yn Taro’n Ôl
Tarodd Ulster yn ôl yn fuan wedyn gyda thri phwynt o droed eu maswr, Ian Humphreys.
Bu rhaid i’r ymwelwyr orffen yr hanner gyda phedwar dyn ar ddeg wedi i’r cefnwr, Dan Evans gael ei anfon i’r gell gosb wyth munud cyn yr egwyl. A thalodd y Scarlets y pris dri munud yn ddiweddarach wrth i’r blaenasgellwr rhyngwladol, Stephen Ferris groesi ar gyfer cais cyntaf y Gwyddelod. Ond cadwodd y tîm o Gymru eu mantais ar yr egwyl gan i Humphreys fethu’r trosiad. 10-8 i’r Scarlets ar hanner amser.
Ond roedd Ulster ar y blaen yn gynnar yn yr ail hanner yn dilyn dwy gic gosb gan Humphreys, y naill wedi 44 munud a’r llall ddau funud yn ddiweddarach. Yna, ychwanegodd y maswr dri phwynt arall toc cyn yr awr er mwyn agor saith pwynt o fantais gyda chwarter y gêm ar ôl.
Ail Gais Ferris
A sicrhaodd Ulster y fuddugoliaeth ychydig funudau yn ddiweddarach gydag ail gais Ferris. Ac roedd hwn yn dipyn o gais hefyd, y chwaraewr rheng ôl yn rhedeg yn gryf ac yn gyflym at y llinell gais o 40 medr gan wthio amddiffyn y Scarlets o’r neilltu’n rhwydd. Trosodd Humphreys y ddau bwynt ychwanegol er mwyn ei gwneud hi’n 24-10 gyda chwarter awr yn weddill.
Fe wnaeth y Scarlets achub pwynt bonws diolch i gais yr wythwr, Keiran Murphy a throsiad Jones bum munud cyn y diwedd. Ond methodd bois y sosban ag achub gêm gyfartal yn y munudau olaf er i Ulster orffen y gêm gyda phedwar dyn ar ddeg yn dilyn cerdyn melyn Adam Macklin wyth munud cyn y diwedd.
Mae’r Scarlets yn disgyn i’r seithfed safle yn y RaboDirect Pro12 o ganlyniad i’r golled ym Melfast gan i Treviso ennill oddi cartref yn erbyn Connacht heno hefyd.
