17 pwynt i Stephen Jones
Scarlets 22–12 Dreigiau

Y Scarlets a oedd yn fuddugol yn y gêm rhwng y ddau ranbarth o Gymru ym Mharc y Scarlets nos Wener.

Gallai Stephen Jones fod wedi methu’r gêm hon gan ei fod wedi derbyn gwahoddiad i gynrychioli’r Barbariaid yn erbyn Awstralia yn Twickenham ddydd Sadwrn. Ond dewisodd chwarae i’r Scarlets a’r maswr profiadol oedd y gwahaniaeth rhwng y ddau dîm wrth iddo gicio 17 pwynt mewn gêm ddigon diflas.

Hanner Cyntaf

Aeth y tîm cartref ar y blaen wedi dim ond dau funud. Cafodd y bêl ei harafu yn ardal y dacl gan gyn chwaraewr y Scarlets, Gavin Thomas a manteisiodd Stephen Jones yn llawn wrth drosi tri phwynt cyntaf y gêm.

Y tîm cartref a oedd yn troseddu yn ardal y dacl ychydig funudau yn ddiweddarach a chosbwyd hwy gan Jason Tovey, y maswr yn unioni’r sgôr gyda chic gosb i’r Dreigiau.

Daeth Aled Brew yn agos at sgorio cais cyntaf y gêm wedi deg munud ond cafodd ei atal rhag tirio yn y gornel gan dacl dda Gareth Maule.

Yna, adferodd Jones fantais y Scarlets gyda chic gosb wedi 17 munud cyn ei hymestyn gyda thri phwynt arall wedi hanner awr, 9-3 i fois y sosban.

Unig Gais y Gêm

Caeodd Tovey’r bwlch i dri phwynt gyda’i ail gic gosb lwyddiannus cyn i’r Scarlets sgorio cais cyntaf y gêm eiliadau cyn yr egwyl. Y prop, Rhys Thomas yn tirio yng nghanol pentwr o gyrff ar y llinell gais cyn i Jones ychwanegu’r trosiad gyda gweithred olaf yr hanner. 16-6 i’r Scarlets ar yr egwyl felly er i’r Dreigiau reoli rhannau helaeth o’r hanner cyntaf.

Y Dreigiau a sgoriodd gyntaf yn yr ail hanner, Tovey yn lleihau’r bwlch i saith pwynt gyda’i drydedd gic gosb wedi 45 munud. Dim ond trosgais oedd y Dreigiau ei angen yn awr ond doedd yr un o’r ddau dîm yn edrych fel sgorio cais mewn gwirionedd.

Anfonwyd wythwr y Dreigiau, Tom Brown i’r gell gosb gyda deuddeg munud yn weddill yn dilyn trosedd yn ardal y dacl. A chosbwyd y Dreigiau ym mhellach wrth i Jones lwyddo gyda’r gic gosb ganlynol i adfer mantais ddeg pwynt y Scarlets.

Dim Pwynt Bonws

Roedd y Dreigiau yn meddwl eu bod wedi ennill pwynt bonws o leiaf pan giciodd yr eilydd o faswr, Steffan Jones gic gosb i’r Dreigiau gyda phum munud yn weddill ond dwynwyd y pwynt bonws hwnnw oddi wrthynt gyda chic gosb Stephen Jones i’r Scarlets ddau funud yn ddiweddarach. Cafodd Steffan Jones un cyfle arall yn yr eiliadau olaf ond methodd gyda chic anodd o’r llinell hanner wrth iddi orffen yn 22-12 i’r Scarlets.

Mae’r canlyniad yn codi’r Scarlets i’r chweched safle yn y RaboDirect Pro12 tra mae’r Dreigiau yn aros un safle oddi ar y gwaelod gyda dim ond dwy fuddugoliaeth trwy’r tymor yn y gynghrair.