Dreigiau 22–7 Caerwrangon
Mae gobeithion y Dreigiau yn fyw o hyd yng Nghwpan Her Ewrop wedi iddynt drechu Caerwrnagon ar Rodney Parade nos Wener.
Chwaraeodd yr ymwelwyr dros awr o’r gêm gyda phedwar dyn ar ddeg a manteisiodd y Dreigiau’n llawn gyda buddugoliaeth gymharol gyfforddus.
Dechreuodd Caerwrangon yn dda wrth i Connor Braid drosi ei gais ei hunan yn y dau funud cyntaf.
Ymatebodd y Dreigiau’n dda serch hynny gyda throsiad Angus O’Brien yn unioni’r sgôr wedi cais Tavis Knoyle yn y gornel.
Daeth trobwynt y gêm wedi chwarter awr o chwarae wrth i flaenasgellwr yr ymwelwyr, Sam Betty, gael ei anfon oddi ar y cae gyda cherdyn coch am daflu dwrn.
Ciciodd O’Brien y Dreigiau dri phwynt ar y blaen wedi hynny ond methodd y Cymry â chreu mwy o argraff ar y sgôr-fwrdd cyn hanner amser.
Dechreuodd y Dreigiau fanteisio ar y gwagle ar ôl troi gyda Tyler Morgan yn bylchu i groesi am ail gais ei dîm wedi deg munud.
Ychwanegodd Sam Hobbs y trydydd toc cyn yr awr wedi hyrddiad cryf ac roedd y fuddugoliaeth fwy neu lai yn ddiogel.
Yr unig siom i’r Dreigiau oedd iddynt fethu sgorio pedwerydd cais yn y chwarter olaf i sicrhau pwynt bonws er curo a churo ar y drws.
Bu rhaid iddynt fodloni ar fuddugoliaeth yn unig, ond mae honno’n ddigon i gadw eu gobeithio main o gyrraedd wyth olaf y gystadleuaeth yn fyw. Maent bellach yn drydydd yng ngrŵp 3 gyda dwy gêm yn weddill.
.
Dreigiau
Ceisiau: Tavis Knoyle 8’, Tyler Morgan 51’, Sam Hobbs 58’
Trosiadau: Angus O’Brien 8’, 58’
Cic Gosb: Angus O’Brien 25’
Cerdyn Melyn: Ollie Griffiths 19’
.
Caerwrangon
Cais: Connor Braid 2’
Trosiad: Connor Braid 2’
Cerdyn Coch: Sam Betty 15’
