Bydd George North yn chwarae i Gymru am y tro olaf ddydd Sadwrn (Mawrth 16).
Mae’r chwaraewr rygbi wedi cyhoeddi y bydd yn ymddeol o rygbi rhyngwladol ar ôl ennill cap 121 dros ei wlad yn erbyn yr Eidal yng Nghaerdydd.
Bydd yn parhau i chwarae rygbi clwb, gan symud o’r Gweilch i Provence yn Ffrainc ar gyfer tymor 2024-24.
George North, sy’n 31 oed, sydd wedi ennill y nifer uchaf o gapiau dros Gymru ar ôl Alun Wyn Jones a Gethin Jenkins.
Dros y flwyddyn ddiwethaf, mae rhestr hir o chwaraewyr Cymru wedi ymddeol, gan gynnwys Alun Wyn Jones, Justin Tipuric, Leigh Halfpennny a Dan Biggar.
‘Lwcus iawn’
Wrth wneud y cyhoeddiad, dywed George North bod nawr, ar ôl 14 mlynedd yn y crys coch, yn teimlo fel yr amser iawn i gamu’n ôl.
“Dw i wedi penderfynu y bydd y gêm ddydd Sadwrn yn dod â’m gyrfa ryngwladol i ben,” meddai mewn datganiad ar X, Twitter gynt.
“Dw i wedi caru a gwerthfawrogi bob eiliad yng nghrys Cymru a chael chwarae gyda chyd-chwaraewyr anhygoel.
“Dw i’n lwcus iawn fy mod i wedi byw fy mreuddwyd.
“Dw i’n edrych ymlaen at y bennod nesaf.
“Diolch i chi gyd am y gefnogaeth dros y blynyddoedd.”
