Y Llewod yn ‘gandryll’ ar ôl i swyddog o Dde Affrica gael ei benodi fel TMO

Mae’r Llewod Prydeinig a Gwyddelig yn gandryll yn dilyn penderfyniad i benodi swyddog o Dde Affrica fel y TMO [Television Match Official] ar gyfer y gemau yn erbyn y Springboks.

Mae’r TMO yn gyfrifol am wirio penderfyniadau’r dyfarnwr ar sgrin deledu

Cafodd Marius Jonker ei ddewis ar ôl i Brendon Pickerill o Seland Newydd fethu teithio oherwydd pandemig y coronafeirws.

Mae’n debyg mai dim ond ddydd Mercher (21 Gorffennaf) y cafodd y Llewod wybod am y newid.

Mae’r Llewod yn teimlo y dylai cynlluniau wedi bod ar gyfer penodi TMO diduedd pe bai Brendon Pickerill ddim yn gallu teithio.

Credir bod prif hyfforddwr y Llewod, Warren Gatland, yn “gandryll” yn sgil y penderfyniad gyda ffynonellau’r Llewod yn dweud eu bod wedi’u “syfrdanu” i gael gwybod am y newid ar fyr rybudd.

Mae Rygbi’r Byd, oedd yn gyfrifol am benodi’r swyddogion ar gyfer y gyfres, yn dweud nad oedd cludo TMO arall i Dde Affrica yn bosibl oherwydd cyfyngiadau Covid-19.

Nic Berry, o Awstralia, fydd y dyfarnwr ar gyfer y gêm gyntaf yn Cape Town, gyda’r Ffrancwr Mathieu Raynal a Ben O’Keeffe o Seland Newydd yn ei gynorthwyo.

Bydd y cymal cyntaf yn cael ei chwarae yn Cape Town ddydd Sadwrn (24 Gorffennaf), gyda’r gic gyntaf am 5 o’r gloch.