Tri newid ymhlith olwyr Cymru i herio’r Ariannin

Mae Wayne Pivac, prif hyfforddwr tîm rygbi Cymru, wedi cyhoeddi tri newid i’r tîm i herio’r Ariannin yn Stadiwm Principality yng Nghaerdydd ddydd Sadwrn (Gorffennaf 10).

Daw Kieran Hardy i mewn yn fewnwr, tra bod Hallam Amos ac Owen Lane wedi’u dewis ar yr asgell gyda Jonah Holmes yn gefnwr yn absenoldeb Leigh Halfpenny.

Bydd Hardy yn cadw cwmni i Callum Sheedy yn safle’r haneri, tra bod Jonathan Davies a Uilisi Halaholo yn y canol.

Yr un yw’r pac, gyda Nicky Smith, Elliot Dee a Dillon Lewis yn y rheng flaen, gyda Ross Moriarty, James Botham ac Aaron Wainwright yn y rheng ôl.

Ben Carter a Will Rowlands sy’n cwblhau’r tîm yn yr ail reng.

‘Y gwrthwynebwyr perffaith’

“Yr Ariannin yw’r gwrthwynebwyr perffaith i ni y penwythnos hwn, a dyma’r union brawf rydyn ni ei eisiau ar gyfer y grŵp hwn o chwaraewyr,” meddai Wayne Pivac.

“Byddwn ni’n cael ein profi yn y blaen a bydd yr elfen gorfforol ar lefel nad yw rhai o’r chwaraewyr hyn wedi’i brofi o’r blaen, ond bydd hynny’n ateb llawer o gwestiynau i ni wrth i ni adeiladu tuag at Gwpan Rygbi’r Byd 2023.

“Mae’n wych cael chwarae yng Nghaerdydd unwaith eto, ac rydyn ni eisiau chwarae rygbi gyffrous, a fydd yn cael y cefnogwyr ar eu traed.

“Mae’n addo bod yn achlysur gwych.”

Tîm Cymru

Nicky Smith, Elliot Dee, Dillon Lewis, Ben Carter, Will Rowlands, Ross Moriarty, James Botham, Aaron Wainwright; Kieran Hardy, Callum Sheedy, Owen Lane, Jonathan Davies (capten), Uilisi Halaholo, Jonah Holmes, Hallam Amos