Mae Eddie Jones, prif hyfforddwr tîm rygbi Lloegr, yn gwrthod beio’r dyfarnwr Pascal Gauzere ar ôl i’w dîm golli o 40-24 wrth i Gymru gipio’r Goron Driphlyg yng Nghaerdydd neithiwr (nos Sadwrn, Chwefror 27).

Ac mae Wayne Pivac, prif hyfforddwr Cymru, yn dweud ei fod e a’i dîm eisoes yn canolbwyntio ar y gêm nesaf wrth iddyn nhw lygadu’r Gamp Lawn annisgwyl ar ôl hanner cyntaf digon siomedig ym Mhencampwriaeth y Chwe Gwlad o ran perfformiadau.

Fe chwaraeodd y Ffrancwr Pascal Gauzere ran yn y canlyniad, wrth i Loegr ildio dau gais dadleuol yn ystod yr hanner awr agoriadol, gyda chyn-gapten Lloegr, Martin Johnson yn disgrifio’r penderfyniad cyntaf fel un “hollol warthus”.

Yn ôl Eddie Jones, roedd rhoi dau gais dadleuol i Josh Adams a Liam Williams yn eiliadau hollbwysig yn y gêm.

“Maen nhw’n benderfyniadau enfawr,” meddai.

“Allwn ni ddim dadlau, dydyn ni ddim yn cael dadlau.

“Y cyfan fydd yn deillio o hynny yw dirwy a fydd hynny ddim yn helpu unrhyw un.

“Fydd y ci ddim yn gallu bwyta’i fwyd, na’r wraig yn gallu bwyta, felly alla i ddim dweud unrhyw beth.”

Mae’n dweud ymhellach fod Cymru “wedi cael pwyntiau efallai nad oedden nhw’n eu haeddu” yn sgil y penderfyniadau.

“Roedd Cymru’n fuddugwyr teilwng.

“Rydyn ni’n cymryd cyfrifoldeb llawn a ddim yn beio’r dyfarnwr.

“Ond weithiau mae yna amgylchiadau sy’n digwydd ac sy’n anodd ymdopi â nhw a doedden ni ddim yn ddigon da i ymdopi â nhw.

“Dw i eisiau i ‘nghi fwyta bwyd, felly dw i ddim yn mynd i ddweud unrhyw beth.”

Cymru’n canolbwyntio ar y gêm nesaf

Tra bod Lloegr yn mynd adre’n waglaw ar ôl ildio 40 o bwyntiau yn erbyn Cymru am y tro cyntaf erioed, fydd y dathlu ddim yn para’n hir cyn i dîm Wayne Pivac ganolbwyntio ar y gêm nesaf.

Maen nhw bellach yn llygadu’r Gamp Lawn gyda gemau yn erbyn yr Eidal a Ffrainc i ddod fis nesaf.

Pe bai Cymru’n curo’r Eidal â phwyntiau llawn a bod canlyniadau eraill yn mynd o’u plaid, fe allen nhw ennill y Bencampwriaeth cyn y penwythnos olaf a’r gêm yn erbyn Ffrainc.

“Rydyn ni eisoes wedi siarad yn fras am bwysigrwydd y gêm nesaf,” meddai Wayne Pivac.

“Byddai’n dadwneud llawer o waith da pe na baen ni’n canolbwyntio ar y gêm honno a’r gêm honno’n unig.

“Rhaid i ni sicrhau ein bod ni’n mynd yno [i’r Eidal] ac yn rhoi perfformiad solet arall a gobeithio y cawn ni’r pwyntiau.

“Bydd y penwythnos olaf yn gofalu amdano’i hun.”

Tra ei fod yn canmol cyfraniad yr eilydd Callum Sheedy, mae’n dweud y dylai Maro Itoje, clo Lloegr, fod wedi gweld cerdyn melyn yn yr hanner cyntaf am gyfres o droseddau.

“Mae [pedwar] yn llawer o giciau cosb i un chwaraewr,” meddai.

“Mae e’n gwthio’r ffiniau, yn amlwg, ond mae e’n chwaraewr o safon fyd-eang.

“Weithiau, mae chwaraewyr o safon fyd-eang yn cael gwneud ychydig yn fwy nag eraill.”