Fe fydd y prop Wyn Jones yn chwarae ei ganfed gêm i’r Scarlets wrth iddyn nhw groesawu’r Dreigiau i Barc y Scarlets heddiw (dydd Gwener, Ionawr 1).
Mae hon yn un o ddwy gêm ddarbi heddiw, gyda’r Gweilch yn teithio i’r Gleision.
Fydd cefnwr y Scarlets, Liam Williams ddim ar gael ar ôl methu â gwella o anaf i’w ffêr mewn da bryd.
Daw Tom Prydie i mewn i’r tîm yn lle Tom Rodgers, gyda Tyler Morgan a Steff Hughes yn dechrau yn y canol.
Daw Sam Lousi i mewn i’r ail reng gyda Jake Ball, gyda Blade Thomson, Dan Davis a Sione Kalamafoni i gyd yn dod i mewn i’r rheng ôl.
Mae Nick Tompkins a Leon Brown yn dychwelyd i dîm y Dreigiau tra bod Jamie Robers yn hunanynysu o ganlyniad i’r coronafeirws.
Mae Rhodri Williams, cyn-fewnwr y Scarlets, ymhlith eilyddion y Dreigiau ar ôl iddo yntau hefyd fod yn hunanynysu.
Mae’r maswr Sam Davies yn dal allan ar ôl anafu ei goes cyn y Nadolig.
