Scarlets 19–9 Glasgow
Sicrhaodd gais hwyr Rory Pitman fuddugoliaeth i Fois y Sosban yn y Guinness Pro12 nos Wener wrth i Glasgow ymweld â Pharc y Scarlets.
Y tîm cartref oedd y tîm gorau am ran helaeth o’r gêm ond wedi gwastraffu llu o gyfleoedd bu rhaid iddynt aros am gais hwyr yr eilydd wythwr sicrhau’r canlyniad.
Hanner Cyntaf
Ciciodd Steve Shingler y tîm cartref ar y blaen yn dilyn sgrym dda wedi dim ond pum munud cyn i Peter Horne unioni pethau ddau funud yn ddiweddarach.
Ychwanegodd Shingler ei ail gic gosb yn fuan wedyn i roi Bois y Sosban ar y blaen eto wedi chwarter awr o chwarae.
Trosodd y canolwr cartref dri phwynt arall cyn yr egwyl, 9-3 y sgôr wedi deugain munud.
Ail Hanner
Glasgow a Horne sgoriodd bwyntiau cyntaf yr ail hanner wrth i goc gosb y maswr gau’r bwlch i dri phwynt.
Doedd dim dwywaith serch hynny mai’r Scarlets oedd yn edrych fwyaf tebygol o groesi am gais a gwastraffodd Harry Robinson gyfle da i wneud hynny yn y gornel dde yn dilyn gwaith da Steffan Evans.
Cyfnewidiodd Horne a Shingler gic gosb yr un wedi hynny cyn i Shingler ddod o fewn trwch blewyn i sgorio cais. Cafodd ei atal yn y gornel chwith gan dacl dda, ond mater o amser oedd hi.
Yr eilydd wythwr, Rory Pitman, gafodd hwnnw yn y diwedd, yn tirio o dan y pyst yn dilyn cyfnod hir o bwyso.
Ychwannegodd Shingler ddau bwynt arall i sicrhau buddugoliaeth, 19-9. Mae’r canlyniad yn codi’r Cymry i’r chweched safle yn nhabl y Pro12.
.
Scarlets
Cais: Rory Pitman 77’
Trosiad: Steve Shingler 78’
Ciciau Cosb: Steve Shingler 5’, 13’, 25’, 64’
.
Glasgow
Ciciau Cosb: Peter Horne 7’, 44’, 61’
