Dreigiau Casnewydd Gwent 20–19 Treviso
Gorffennodd y Dreigiau dymor siomedig gyda buddugoliaeth dros Treviso ar Rodney Parade nos Sadwrn.
Roedd angen cic gosb hwyr Jason Tovey ar y Cymry i sicrhau’r fuddugoliaeth, ac i sicrhau eu bod yn gorffen y tymor uwch ben Treviso yn y RaboDirect Pro12.
Hanner Cyntaf
Gyda Treviso’n brwydro yn erbyn Zebre am safle Ewropeaidd, roedd hon yn gêm dipyn pwysicach i’r Eidalwyr na’r Dreigiau, ac roedd hynny i’w weld wrth iddynt fynd ar y blaen gyda chais cynnar Fabio Semenzato.
Tarodd Tyler Morgan yn ôl i’r Dreigiau gyda chais taclus, y canolwr yn dangos dwylo da cyn ochr gamu’n slic a chroesi o dan y pyst.
Yr Eidalwyr oedd ar y blaen ar yr egwyl serch hynny gan i Alberto di Bernardo lwyddo gyda dwy gic gosb yn erbyn un Jason Tovey, 10-13 y sgôr wedi deugain munud.
Ail Hanner
Aeth y Dreigiau yn ôl ar y blaen yn gynnar yn yr ail hanner diolch i gais Will Harries a throsiad Jason Tovey ac roedd y tîm cartref yn ymddangos yn gymharol gyfforddus gyda chwarter y gêm i fynd.
Ond tarodd Treviso yn ôl gyda chais Manoa Vosawai ar yr awr a chic gosb di Bernardo ddeg munud yn ddiweddarach.
Roedd angen cic hwyr Tovey i gipio’r fantais yn ôl i’r Cymry felly ond fe ddaliodd y Dreigiau eu gafael ar yr un pwynt o fantais wedi hynny tan y diwedd.
Mae’r fuddugoliaeth yn codi’r Dreigiau i’r nawfed safle yn nhabl terfynol y Pro12 ond mae pwynt bonws Treviso’n ddigon i sicrhau lle iddynt hwy ym mhrif gystadleuaeth Ewrop y tymor nesaf.
.
Dreigiau
Ceisiau: Tyler Morgan 30’, Will Harries 45’
Trosiadau: Jason Tovey 30’, 45’
Ciciau Cosb: Jason Tovey 4’, 73’
Cardiau Melyn: Will Harries 13’, Lewis Evans 69’
.
Treviso
Ceisiau: Fabio Semenzato 15’, Manoa Vosawai 60’
Ciciau Cosb: Alberto di Bernardo 25’, 32’, 69’
